U Bah Heaving Stone Kharpran, MLA ka Mawryngkneng Constituency hynne ka sngi ha ka Dorbar Mang Tyngka jong ka Jylla, u la wanrah ia ka sobjek halor ka jingthmu ka sorkar ban kynton ia ki karkhana ha ki thaiñ Byrnihat kaba dei ruh ka jaka kaba la ioh nam kum kawei na ki Shnong ba jaboh tam ha India.
Na ka liang u Bah Kharpran u la pynpaw ia ka jingdiaw ban tip ba ka Sorkar Jylla ka thmu ban wanrah ia ki karkhana ba bun jait hynrei ka khlem pyrkhat shuh ia ka koit ka khiah jong ki paidbah bad ka jingkhuid jong ka mariang.
“Kane ka jingthmu kan wanrah ia ka jingkylla ha ka mariang, ka jingjaboh ha ka um bad ka lyer.
Hato ka Sorkar ka lah ban buh da ki lad ban tyngkai ia ka mariang bad ia ka jingkhuid” buh jingkylli u Bah Heaving Stone ia ka Sorkar.
Kum ka seng thymmai, ka VPP ka la pynpaw ia ka jingpyrshah jur ia kane thong jong ka sorkar bad na ka liang jong u Nongïalam ba Rangbah ka seng, Bah Ardent Miller Basaiawmoit ruh u la pynsngew sha ka Sorkar ba ka seng kam pyrshah ia kum kine ki projek hynrei nyngkong ka dei ban peit ia ka jingbha jingmiat jong ka thaiñ bad ka jingkhuid jong ka mariang “Ha ka 24 Naitung 2024 ngi la leit buh da ka Shithi sha u Myntri Rangbah Conrad K. Sangma bad la kdew ruh ha katei ka shithi bunjait ki mat. Ngi la kdew ruh ia ka jingsngew khia halor ka jingktah jong ka mariang, halor ka jingtih ia ki marpoh khyndew hynrei ka jingleit buh shithi jong ngi ka khlem long kaba seisoh namar haduh mynta u Myntri Rangbah u dang sngap jar” ong u Bah Ardent.
U Bah Ardent u la iathuh ruh ba ka jingjur jong ka jingjakhlia ha ka thaiñ Byrnihat ka dei ruh kaba la wan na ki karkhana kiba don ha Assam bad ym tang na Meghalaya namar katei ka jaka kadei khap-pud bad ka jylla Assam. “Shah ngan pynkynmaw ia phi Shongknor ba don burom, ba ki briew kiba don ha kitei ki jaka ki la ïakhih na ka por sha ka por ban pyrshah ia ka jingthmu jong ka Sorkar ban buh ia ki karkhana ha kitei ki jaka. Ngi sngewthuh ruh ba ka lada ka Sorkar ka thmu ban pynurlong ia kitei ki jingthmu ki hap ban pom ia ki dieng na ka bynta ban buh ia ki karkhana. Ngi kwah ban iohi ia ka roi ka par hynrei ym ban ktah ia ka mariang bad ia ka jingshngaiñ jong ki briew kiba sah ha kitei ki jaka”.