-Ioh kem ar ngut ki nongdih drok bad ai jingsneng jingkyntu ka JNC- Khliehriat Circle-
Ka Jaintia National Council (JNC) – Khliehriat Circle mynta ka Sngi ka 23 Tarik u May 2025 hapoh ka jingïalam jong u Working President bah Diamon Bareh bad u General Secretary bah Symboh Baiar Sumer ka la shim ia ka sienjam ba khlaiñ ban ïakhun pyrshah ïa ka jingdih drok kumjuh ka jingkhaii ia u drok hapoh ka thaiñ da kaba bat syndon ia arngut ki samla kiba la kyrni ha u drok ha kawei na ki jaka hapoh ka thaiñ Khliehriat.
ka seng daka jingsngewkhia ka la leit ban bat ïa kine ki arngut bad la wanrah ïa ki sha ka ïng-treikam jong ka JNC ha Khliehriat ban ai ia ki jinghikai kaba bha da kaba ai iaki jingsneng katto katne ryngkat ki jingkyntu kynpham ba u drok u long u nongshun bah haka imlang ka sahlang, bad la kyntu ruh iaki ban ïaid sha ka lynti kaba bha khnang ban lait na u drok namar ym ba u pynsngewsih tang ha iing hynrei u thaw ruh iaki ba bun ki jingeh khamtam haka jinglong shngain ia ka Shnong ka thaw bad ruh hakaba khatduh hi u pynkut iaka jingim u briew tang haki Khyndiat por.
Ka seng kum ka dak ban pynpaw iaka jingsniew jong u drok uba long kum u nongshun bah jong ka bha ka miat ka la pyni da kaba thang syndon ia u drok bala ioh bat na kine ki arngut.
Hadien kata ka seng ka la pyntip kloi ïa ki kmie ki kpa jong ki, bad la khot ruh ïa ki ban wan shimti ïa ki. Ha ka por ba ia kren bad kine ki arngut, ki la ai ruh ia ka jingtip ba don bun ki nongdie drok kiba trei hapoh East Jaintia Hills District.
Ka JNC–Khliehriat Circle ka la pynpaw ïa ka jingsngewkhia kaba jur ha kaba iadei bad ka jingioh laitlan kine ki nongkhaii drok hapoh ka thaiñ bad la kyntu jur ruh ia ki tnad sorkar kiba peit ia kane ka kam ba kin leh iakaba donkam tam. Ka seng ka ong ba kan sa bteng ban ïakhun pyrshah haduh ba kin ioh ban kem bad pynngat ha ka aiñ ïa kiba donkti ban die drok hapoh kane ka thaiñ.
“Kane ka dei tang ka jingsdang, bad ngin ym shong kli kti tad haduh ba ngin pynpra lut ïa kine ki kynhun nongdie drok ha East Jaintia Hills,” ong u Working President ka JNC–Khliehriat Circle.
Ka seng ka kyrpad ruh ïa ki paidbah ba kin long kiba husiar bad ban ai jingtip ruh lada don kino kino ki jingjia kiba kum kine khnang ban shngaiñ ka shnong ka thaw bad ban suk ka imlang sahlang.
