Sa u wei pat u kyrtong ba wan thep kyrteng mynta ka sngi u dei u ma Corentis Rabon u kyrtong ka BJP na ka 4-Mowkaiaw Constituency.
U ma Rabon ha ba ai jingkren ula ong ka jingwan jong u sha ka jylli jong ka saiñ hima sima ka long kaba khia bha haduh katta katta kumta um banse ban ïakhun ïa kane ka Election ban wan khnang ba un lah ban wanrah ïa ka shongsuk shong shngaiñ ki thaiñ khappud bad ruh ki kam pynroi kiba dang sahteng hapoh ka 4-Mowkaiaw Constituency hi baroh kawei.
“Ka jylla kala dap 50 snem, hynrei ki jingkylla kim don satia”, la ong u ma Corentis. Kumta na ka liang jong u, ula phai khmat syndon sha ka party BJP kaba long ka party heh kaba lah ban trei na ka bynta ki paidbah da kaba kyntu ïa ki paidbah ban ai ka jingkyrshan ba pura ïa u ha kane ka kynti.
Ula ong ba ka thaiñ Elaka Shilliang Myntang ka long kaba dang sahdien bha haduh katta katta bad kum u kyrtong ba marwei na katei ka thaiñ khappud, ula pynsngew ba man ka por ha ki jaka khappud kila shait wan ki jingeh na ka jingïajia pud. Kumta u ong ba nyngkong eh donkam ban wanrah shwa ka jingshongsuk khnang ba ki kam pynroi ki wan hadien sha kine ki thaiñ.