U MLA ka Jowai ma Wailadmiki Shylla uba long ruh u Chairman ka Meghalaya Urban Development Authority (MUDA) mynta ka sngi u la wan ban pyllait ia ki saw tylli ki kali thymmai ban pyndonkam ha ki bynta bapher bapher jong ka Jowai Municipal Board (JMB), kiba kynthup ia ka Water Tanker, Conservancy trucks, Organic Waste Converters (Composing Machines) and Bailing Machine, ha ka jingialang kaba la pynlong ha phyllaw jong ka Jowai Municipal Board (JMB), Khimusniang, Jowai, West Jaiñtia Hills District.
U ma Wailad haba kren mynta ka sngi u la ong ba hapoh ka JMB dang bun ka pisa kaba dang shu sah kaba iadei bad ka skim shna ia ki paiñkhana na ka bynta ki briew ba sah ha Sor (Urban) ia kaba kane ka juh ka skim la juh ai sha ki shnong nongkyndong, kumta u la kyntu ia ki paidbah ka sor Jowai kiba dei hok ban ioh ka kane ka skhim ba kin wan mih sha khmat ban wan shim ia ka.
Shuh shuh u la ong ba dang bun ki skim ne ki kynja loan kiba ka JMB ka don na ka bynta ki paidbah ki ba don bad ka subsidy, u la ong ruh kumba long mynta sa katto katne por kane ka Board kan pynmih ruh shi bun tylli ki Post ha ki bynta bapher bapher jong ka.
Ha ka jingiadei bad ka jingplie ia kine ki kali kiba lah ban pyndonkam ha ki bynta bapher bapher u la ong ba ka long ka jingkyrkhu kaba khraw ia ka nongbah Jowai.
Mynta ka sngi la ioh ruh ia ki jingkren na u Chairman ka Jowai Municipal Board (JMB) u ma Lasooki Lakiang, na ka Chief Executive officer, Jowai Municipal Board kong D.V. Lyngdoh MCS, Doloi Elaka Jowai ma Puramon Kynjing, ha ka jingdonlang u waheh shnong ka Dorbar Shnong Khimusniang ma A. Lamare, ki nongtrei ka JMB bad kiwei de ki riew rangbah.
