Ka Meghalaya AIDS Control Society (MACS) mynta ka sngi ka 28 tarik Naiwieng2025 ka la wan pyntip ha Shillong Press Club ba kan pynlong ia ka jingrakhe ia ka World AIDS Day ha ka 1 tarik Nohprah 2025.
Kumta ka MACS ka khot ka wer ia ki paidbah baroh ban iashim bynta ha kane ka jingrakhe ia ka World AIDS Day khamtam ia kito kiba la ngat ha une u khniang jingpang HIV/ AIDS, khnang ban pynkylla bad ban wad ia ki lad ki lynti ban iarap ia ki briew kiba ngat ha une u khniang jingpang bad kumjuh ban wanrah ia ka jingkylla ha ka longïing longsem, ha ka imlang ka sahlang bad ha ka jylla, khnang ban wanrah ia ka jingrat dyngkhong ia une u khniang jingpang hapoh u snem 2030.
Ha ka jingrakhe ia ka World AIDS Day kan don ruh ka jingiaid Rally da ki thuk thuk kum ka dak ban pynsaphriang bad ban pynshai sha ki paidbah ba ki dei ban shimkhia haba iadei bad ka jingpang HIV / AIDS.
Haba iadei bad ka jingpang HIV / AIDS ha ka jylla ka jingpang ka la nang kiew bha khamtam ha East Khasi Hills bad kumjuh ha Jaintia Hills ki dei ki district kiba shah ktah bha na u khniang jingpang HIV/ AIDS .
Ka Dr. KL Ïawbor Project Director MACS ka la iathuh ba ka jingdon kiba pang HIV/AIDS ha ka jylla ka la nang jur bad kiba la shah ktah bha ki dei kiba la kham san.
Shuh shuh ka la iathuh haduh mynta kiba ioh ia ka jingpang HIV kiba la pynrung kyrteng ki don palat ia ka 10 hajar ngut, ki shynrang 5303 bad ki kynthei ki don 5033, nangta ki khynnah kiba ioh ia kane ka jingpang ha ki shynrang ki don 244 ngut bad ki kynthei khynnah pat ki don 263 ngut.
