Ha ka jingpyrshang kaba kongsan ban kyntiew ia ka kam rep ha nongkyndong, ka ICICI Foundation, ka CSR jong ka ICICI Bank, ka la shim ia ka sienjam ban kyntiew ia ka kam rep kam riang ha Nongkyndong bad ha jylla Meghalaya bad kumjuh ban kyntiew ia ka ioh ka kot ki nongrep bad kumno ban pyniaid iew ia ki mar rep jong ki.
Ka jingiarap jong ka ICICI Foundation ha Umling Block ka phaikhmat sha ka jingpynbeit ia ki jingeh kiba ki nongrep ki mad la slem, kynthup ia ka jingmih kaba duna, ka jingtwa khyndew, ki rukom rep mynbarim, bad ka jingduna ka jingioh ia ki symbai kiba bha.
Ha kane ka sienjam kaba nyngkong, ka ICICI Foundation ka la kam palat 12.6 lak tylli ki symbai sohtrun kiba la sam sha ki 310 ngut ki nongrep. Nalor kata, la pynbiang 1.38 lak kilo u symbai sying bad 49,350 kilo u shynrai ban kyrshan ia ka kam rep kam riang.
Ki nongrep ki shah hikai ruh ha ki rukom rep katkum ka juk mynta bad kiba iahap katkum ka jaka kane ka thaiñ kaba dei ka jaka jur slap.
Kane ka jingangnud ka ICICI Foundation ka la seisoh ha kaba ka la don ka jingkiew lypa kaba 10 percent ia ka jaka ban rep ha baroh 35 tylli ki shnong, ha kaba 300 akar mynta la rep ia u sohtrun.
La iohi ruh ba ka don ka jingthnem ha ka kam rep ia ki musli musla bad kumba 871 ngut ki nongrep ki rep ia u sying bad u shynrai ha ka jaka kaba heh 277 acre bad 180.5 acre.
Ka jingpynmih ia u sying la antad ba kan poi sha ka 3,200 kilogram ha ka shi akar, bad shynrai 1,000 kilogram ha ka shi acre bad baroh ar ki iadei bad ka jingkheiñ jong ka ri hadien ka jingpynmih kaba 1.8 snem.
Ki nongrep kiba rep ia u sying la khmih lynti ba kin kamai kumba T.1,13,000 shi acre ha ka shisnem, katba kito kiba rep ia u shynrai la khmih lynti ba kin kamai T.25,000 shi acre ha ka shisnem. Ka jingangnud ka ICICI Foundation ban pyniar bad pynkhlaiñ ia ka kamai kajih ki nongkyndong bad kumjuh ha India baroh kawei.
