[AFP Photo]
Ka jingkhynñuih u Jumai bakhlaiñ bor ba la jia ha ki thaiñ shatei jong ri Afghanistan, ka la wanrah ka jingïap palat 1,400 ngut bad ka jingmynsaw la palat 3,000 ngut, katkum ka jingkheiñ ba la pynmih da ka sorkar Taliban mynta ka sngi. Kane ka dei kawei na ki jingkhynñiuh Jumai ba jur tam ba la jia ha kane ka ri ha kine ki spah snem ba la leit pynpaw ka sorkar.
Ka jingkhynñuih u Jumai kaba don ka jingkhlaiñbor haduh 6.0 magnitude, ka la jia ha ka miet sngi U Blei, kaba la pynpra ïa kiba bun ki ïing, ki sem kumjuh ruh ka jingtwa ki riat ki lum ha ki bynta kiba marjan bad ka khappud jong ri Pakistan.
Ka jylla Kunar ka dei kaba la shah ktah jur tam, ha kaba la lap ba 1,411 ngut ki briew ki la khlad bad palat 3,100 ngut ki la mynsaw. Ha ka jylla Nangarhar kaba marjan, la kumno kumno 12 ngut ki briew ki la khlad bad hajar ngut ki la mynsaw.
Ki jingai jingïarap bad jingsumar ki dang iai bteng katba ki nongtrei naduh ki bor shipai bad kiwei kumjuh ruh ki nongshong shnong ki dang wad ïa kiba dang jah rngai.
“Ngim pat lah ban pyndep lut, dang bun kiba mynsaw ba dang don ha ki shnong kiba jngai bad ki hap ban rah sha hospital,” ong u Ehsanullah Ehsan, Director jong ka Kunar Provincial Disaster Management Authority.
Ki bynta kiba shah ktah jur tam ki dang shem jingeh ban rung namar ba ki surok ki la paid la pra lut, la ong shuh shuh ka khubor na Afghanistan.
