Kumba palat 400 ngut ki khynnah shynrang bad kynthei na ki skul bapher bapher jong ka East kila wan ban iashim bynta mynta ka sngi ha ka jingpyni ia ki sap ha ka liang ki kam sport bala pynlong da ka Meghalaya State Olympic Association (MSOA) bad ka Department of Sports and Youth Affairs, Government of Meghalaya ha ka jingiatrei ryngkat bad ka Edge 10 Group.
Ia kane ka jingpeit thuh ia ka sap ki khynnah la pyntrei da ka Edge 10 Group hapoh ka jingkhmih jong u Ian Campbell u ba dei u Australian Olympian. La pynlong ia kane ka prokram ha Indoor Hall jong ka Dkhiar East, East Jaiñtia Hills District.
Ha kane ka prokram la iadon lang ruh u MLA ka thaiñ uba dei u Myntri ka Social Welfare Department, Revenue and Disaster Management Department, etc u ma Kyrmen Shylla, u Working President ka Meghalaya State Olympic Association (MSOA) u bah F. Kharshiïing bad ka kong Stephanie M Rapsang kaba dei ka District Sport Officer ka East Jaiñtia Hills District.
U bah Kharshiïing ula iathuh ba kane ka jingpeitthuh ia ka sap jong ki khynnah (Talent Identification Programme) la lah ban pyndep ha ki 10 tylli ki District jong ka jylla Meghalaya bad ka East Jaiñtia Hills District ka dei ka District kaba 11 bala pynlong ia kane ka prokram.
Ula pyntip ruh ba kum kane ka juh ka prokram yn sa pynlong ha nongbah Shillong ka ban sdang naduh ka 26 tarik mynta u bnai haduh ka 29 tarik mynta hi u bnai. Ula ong ruh ba lada jia ba don kino kino ki khynnah skul ki bym ioh lad ban wan iashim bynta ha ki District jong ki, ki lah ban wan sha nongbah Shillong da kaba ai jingtip shwa sha u Chairman jong ka Podium Finish Committee MSOA u bah Dipshon Ryntathiang.
U Ian Campbell ula iathuh ba ka Edge 10 Group kala dep ban pynlong ia kum kine ki prokram ha kiba bun ki District jong ka jylla bad kila iohi ia ka sap kaba ki khynnah shynrang bad kynthei kiba don ha ka rta ba 10 snem shaneng ki don. Kumta u kyntu ia baroh ki nongwan iashim bynta jong ka East Jaiñtia Hills ba kin long kiba trei shitom ban nang pynbha shuh shuh ia ka sap kaba ki don khnang ba kan long ka jingmyntoi ia ki.
Ki test kiba la pynialeh mynta ka sngi ki kynthup ia ka 20M Sprint, 10M Ladder Run, Compass Drill, bad ka Vertical Jump.
