Ka Joint Action Committee of Local People on Kynshi hydro Power Project (JCLPKHPK) kaba hap ha West khasi Hills bad South West Khasi Hills hynne ka sngi ka 3 tarik Naitung 2025 ki la wan iakynduh ia u Myntri ka tnad Bording u AT Mondal ban pan jingpynshai haba iadei bad ka Kynshi hydro Project.
Haba kren sha ki lad pathai khubor na ka liang u Secretary ka JCLPKHPK u la ong ka Committee ka la pan jingshai haba iadei bad ka jingsoi Mou biang ka Sorkar bad ka Company M/S Athena Pvt Ltd ka Company kaba la shah pynduh ban pyntrei ia ka Kynshi hydro Power Project.
Shuh shuh u la ong ka sorkar ka la sign biang ia ka Mou bad ka company M/S Anthena Pvt Ltd namar kane ka company ka la kyrpad biang ia ka sorkar ban wanrah da ki buit stad saian kumno ban ioh kham bun ka bording watla ka um ka rit, bad dei lyngba jong kane ka sorkar ka la sign biang ia ka MoU bad kane ka company M/S Anthena Pvt Ltd.
U la bynrap ka bynta kaba ar kaba ka committee ka dawa na ka sorkar ba ka dei ban khot lang ia ka Joint Action Committee of Local People of Kynshi Hydro Project ki trai khyndew ki briew jong ka company ban iakren sani bha ha shwa ban sdang ia kane ka kam khnang ba kan nym don kano kano ka jingpynwit.
Na ka liang u Myntri u la kular ban khot lang ia ka Joint Action Committee bad ki trai khyndew ha shwa ban sdang pyntrei ia kane ka Kynshi Project.
