Ki nongialam jong ka Meghalaya People United Front (MPUF), East Jaintia Hills District mynta ka sngi ha ka jingialam jong u President u samla K. Blah kila leit ai da ka jingthoh ha ka ophis trei kam u Deputy Commissioner East Jaintia Hills, na ka bynta ban pan jingbit ne phah khynra ia ka License jong ki dukan die tim (Teer Counter) ha katei ka District khamtam ha Lad Rymbai, kiba kat kum ki jingtip jong ka seng ba kiba bun hi kine ki dukan die Tim ki dei ki bym don license.
La pynpaw ba ha kaba uwei ne kawei kiba don ia ka license na ka bynta kawei ki dukan ne ka counter hynrei katei ka juh ka license ki buh ia ki counter haduh 5 ne 10 tylli. Kumta ha ka jingiadei bad kane na ka liang u President u la kyntu ia ki bor ka District ban shim khia ia kane ka kam, namar u la ong ba kane ka jingplie ia kine ki dukan thoh tim ki bym don ia ka License ka ktah ia ka ioh ka kot jong ka District ne ka sorkar.
Na ka liang u ma Vice President ka Sanshnong u Scientist Sana u la ong ka seng ka dawa ia kane khnang ba kan long ka jingmyntoi ia ka District bad ka jingioh kamai (revenue) jong ka District hi baroh kawei. Ha kaba na ki bor District ruh ki la ong ba kane ka kam ka long kaba donkam na ka bynta ka jingiaid beit iaid ryntih jong ki dukan die tim ha katei ka District.
