Hadien ba la mih ka khubor hamsaia kaba la kynnoh ba u kyrtong shimet ka VPP na ka 1-Nartiang Constituency ula shah thong bad shah pynïeng ban ïakhun ïa kane ka Election 2023, mar mar na ka liang ki nongkyrshan jong u ma Generous Pasleiñ kila ïaleh ban thwet jur ïa ubriew uba ïalam bakla bad pynklumar ïa ki paidbah halor kane ka khubor. Hynrei na ka liang utei u samla ba kynnoh uba la tip kyrteng u Pynhun Phawa na ka shnong Bambthong, West Jaiñtia Hills ula mih hi dalade shakhmat ban wan pan map na kiba ha ïing ha sem u Generous Pasleiñ bad kumjuh na ki paid nongkyrshan jong ka 1-Nartiang Constituency halor kane ka khubor hamsaia kaba khlem nongrim kaba ula pynsaphriang sha ki paidbah jong ka Constituency ha ka por Election.
Haba ïakren bad ki lad pathai khubor u Pynhun Phawa ula ong kane ka jingkynnoh jong u pyrshah ïa u kyrtong ba shimet na ka 1-Nartiang Constituency ka long kaba khlem nongrim bad kaba ula khlei lyngba jingïakren phone bad ki paralok bad ula ong ba kine ki kyntien ki mih na ka daw ka jingbymsngewthuh bad ka jingshoh khawiang. Ula phla ba kine ki kyntien ki mih halor ka ka jingkynnoh ba “ïa u ma Generous Pasleiñ la pynïeng da kiwei pat ki kyrtong kiba la thong da ka pisa kaba kot haduh 7 klur tyngka bad kine baroh ki long kiba bakla bad kiba ula shu thaw hi ”ong u samla Pynhun Phawa. Halor kane u buh ka jingkyrpad na kiba ha ïing jong u Generous Pasleiñ ba kin map noh ïa kane ka jingbakla jong u, ha kaba u kyntu jur ïa ki paidbah ka 1-Nartiang Constituency ba kim dei ban shah ïalambakla ha kane ka khubor bad ki ruh kin map ïa kane.
Na ka liang u ma Generous Pasleiñ (Candidate) ula ong hadien ba la don shibun ki jingshah kynnoh ha kane ka Election ba la dep kata halor ka khubor badon kiba pynïeng ïa u ban ïakhun ïa kane ka Election, ula pynsngew ba kane kalong ka jingshah kynnoh kaba khlem nongrim bad ki bym tip ïa ka jingshisha. Halor kane ula ong kum u kyrtong ula mih shakhmat ban ïakhun ïa kane ka Election ha ka nongrim kaba skhem bad ka mon ba laidluid khlem da don ka jingshah pynbor hangno hangno ruh. “Nga don ka thong ban shakri ïa ka Ri bad ka Jaitbynriew bad ïa u paidbah ba bun ba lang” ong u ma Pasleiñ.
U la kyntu ïa ki paidbah ba kim dei ban pynsaphriang ïa kum kine ki khubor ba bakla, u kyrmen skhem wat lada um poi sha ka thong ka jingjop ruh hynrei u khot ïa ki paidbah nongkyrshan ban don ka jingieit ka jingshañiah iwei ïa iwei khnang ba kane kan nang ïaibteng ha kine ki sngi ban wan. Katba na ka liang u kpa jong u ma GenerousPasleiñ ma Hilarious Dkhar ula ong shisien ula dep long kum u MDC ha ka 2009 bad kane ka jingmih Election u khun jong u ha kane ka Election kam dei satia da ka jingshah thied. U ong haduh kane ka kynti ym shem la don kano kano ka ram wat tang shi tyngka ruh ha ki paidbah hapoh ka Constituency.
Shuh shuh u ma Hilarious Dkhar u ong ha ka jingïaleh ki don kiba jop bad kiba rem hynrei ban don ka jingshah kynnoh shah pynbam pisa kam long kaba bha. Lada kane ka jingshah kynnoh ka dang mih nangne shakhmat kim banse ban pynshitom ïa kiba donkti da kaba aiti sha ki bor ka aiñ. U ong ruh wat lada u khun jong u, u shah rem ha kane ka kynti u kyntu ïa ki paidnongkyrshan ba kim dei ban artatien hynrei kin ïaineh met bad mynsiem bad ban ai ka jingïatreilang bad u khun jong u.