Ka Meghalaya Football Association (MFA) mynta ka sngi ka 20 tarik Naitung ka la ioh ban plie pyrda ia ka lympung Youth League na ka bynta ki khynnah kiba hapoh 14 bad 16 snem hapoh ka jylla baroh kawei.
Ia kane ka lympung la ioh jingkyrshan na ka tnad ïalehkai jong ka Sorkar jylla. Haduh 14 tylli ki jingiakhun la pyndep ha kane ka sngi ha ki 8 tylli ki jaka ïalehkai.
Ha ka jingiaid lynti jong kane ka lympung, na ka liang u Bah Hamlet Dohling uba dei u President watla u khlem ioh ban don ryngkat ha kane ka sngi sdang, u la ai khublei kyrpang ia baroh ki khynnah ïalehkai bad khamtam ia ki nongpyniaid lyngba ka rynsan social media.
Ka Ri-Bhoi ka la ioh ia ka jingjop don burom ha ka jingsdang ia kane ka lympung da kaba pynliem da 3-0 ha ka thup U-14 bad 3-2 ha ka thup U-16.
Haba phai ha ka jingiakhun ba la pynlong ha Garo Hills, ka Tura ka la pynbam haduh 13 kol la 0 ia ka Baghmara.
Ka jingthmu ba la pynlong ia kane ka lympung ka long ban sei ia ki khynnah don sap na ka bynta ban mih khmat ia ka jylla bad ia ka ri baroh kawei. Ym lah ban len ba ka jingpynlong ia kane ka lympung ka la long lypa kaba seisoh ha kaba ka iohi ia ki khynnah don sap na kylleng ki Distrik hapoh ka Jylla.