Ka lympung ïalehkai Judo ba la pynlong da ka Meghalaya Judo Association ha ryngkat ka jingïatreilang bad ka Judo Federation of India ka la ïoh ban jam shakhmat ïa ka jingpynlong ïa ka Asmita Khelo India Women’s League/Ranking Judo Tournament 2024-2025 East Zone ha nongbah Shillong, ha SAI-STC Indoor Stadium kaba ha Nehu.
Kumban shu pynkynmaw, ïa kane ka lympung la sdang naduh ka 16 tarik mynta u Nailar ha kaba ïadei bad ka jingthew kilo ïa ki nongïashimbynta ki ban ïakhun, katba ki jingïalehkai la ïoh ban sdang naduh ka sngi ba bud ha ka 17 tarik. La sakhi ruh ïa ka jingïashimbynta shit rhem jong ki kynthei ha kaba ki la don haduh 350 ngut ki nongïalehkai kiba la ïashimbynta ha ki kyrdan bapher bapher, naduh ka kyrdan Sub Junior, Junior, Cadet bad Senior.
Ha ka sngi plie ïa ka jingïalehkai la wan kongsan da u D. D Shira MCS-Director of Sports and Youth Affairs jong ka Sorkar jylla Meghalaya. Kiwei pat kiba la don ryngkat ha kane ka sngi ki long u Bah Finely L Pariat-General Secretary ka MSOA, u Yogesh Dhadve, Chairman jong ka Judo Federation of India bad ruh jong kane ka 4th Asmita Khelo India Women’s League/Ranking Judo Tournament 2024-25 East Zone, u Banee Brata Das na ka Sports Commission jong ka Judo Federation of India, Madam Sushama Awasthi-dkhot jong ka Judo Federation of India lem bad ki dkhot nongkitkam ka Meghalaya Judo Federation.
Na ka liang jong ka MJA ka la shim ïa ka kabu ban ai khublei ïa baroh kiba la don ryngkat ha kane ka sngi naduh ki kongsan bad khamtam eh ki nongïashimbynta ki ban pynlong ïa kane ka lympung kaba seisoh.
Ngi kyrmen skhem ba kane ka lympung ym tang ba kan pynshlur hynrei kan wanrah ïa ka jingïatylli hapdeng ki nongïalehkai. Shuwa ba ngin sdang ïa kane ka lympung ngin buh jingkynmaw ïa ka jing kordor “ban don ka jingïashimbynta kaba beit, kaba burom, bad ka jingïai shah.
Kat haduh mynta, ki nongïashimbynta ba ladep ïakhun ha ka Sub Junior ki long haduh 78 ngut, bad ha ka Cadet ki long 57 ngut.
