Ka Jaintia Student Movement (JSM) lyngba ka kyrwoh bala pyllait da u Working President, CB ka la pynrem jur ia ka jingleh riewkhlaw bad jingthom bor ka KAAC ia ka khyndew ka shyiap bad ki nongshong Shnong jong ka Meghalaya, khamtam jong ka jaidbynriew Jaiñtia kumba kala jia ha Shnong Khatkasla, Mukroh, Khanduli khlem ka jingiatip lem na arliang manla ki District Administration kumba ka la paw shai ha ka jingkren ka Deputy Commissioner jong ka West Karbi Anglong. Kane ka paw shai ia ka jingkhwan myntoi bad ka buit tuh arsap jong ka KAAC khlem ka nongrim da kaba iaid katkum ki lynti kyndon shynshar khadar.
Ka Seng ruh ka dawa bad kyrpad ia ka District Administration jong ka West Jaintia Hills District bad ka Jaintia Hills Autonomous Council (JHADC) ban shim ia ka sien jam ba tyngeh katkum ki kyndon aiñ ban ym ailad ia kane ka buit sianti bad buit tuh mutlop jong ka Karbi Anglong Autonomous Council (KAAC) ban klun bad iuh roit ia ka hok longbriew man briew jong ka jaidbynriew Jaiñtia. Ka Seng JSM kum kawei na ki Seng ba peit bad pyrkhat ia ka iap ka im jong ki nong Jaiñtia kan ap bad bishar ia ka rai bad ki sien jam ki bor shynshar na ka bynta ka lawei ka jaidbynriew bad ka long ruh kaba la pynkhreh ban ieng iada la kano kano ka lynti lada ka KAAC kan nang bteng ban iaid ka lynti arsap mutlop tang ban myntoi ialade ban ktah mat iong pat ia ki para jaitbynriew ritpaid.
Ha ka juh ka por ruh ka Seng JSM ka ai ka jingiaroh bad jingpyrto ia u ADC ka West Jaintia Hills District, Sir M.A Challam uba kloi ban mih ha khmat ha kano kano ka jingshah thombor ki jaidbynriew Jaiñtia ban ieng iada khlem pyrkhat shuh ia ka jingim la jong. Ka Seng ka kyrmen ba kin mih shibun kum kine ki riew shemphang bad riew Rangbah na ka bynta ka dawbah dawsan bad ka iap ka im ka jaitbynriew.