Ka kynhun ialehkai football jong ka jylla Meghalaya thaw ia ka history da kaba iohrah ia ka takma Rupa bad ka Kamala Gupta Trophy ha ka jingialehkai pynkut ia ka National Football Championshin Hero Santosh Trophy kaba 76 kaba la pynlong ha King Fahd International Stadium ha nongbah Riyadh ha kane ka 4 tarik mynta u bnai.
Kumtu na ka liang jong u Myntri Rangbah ka jylla u Conrad Sangma ula ai khublei bad iaroh ia kane ka kynhun bala thaw ia kane ka history jong ka jylla.
Ka jylla Meghalaya kala rem da 2-3 kol ha ka Karnataka, hapdeng ka jingiakhun kaba iakhad bha ha katei ka stadium ha nongbah Riyadh.
Na ka liang ka tnat jong ka Sport and Youth Affairs hynnin ka sngi kala pynlong da ka Road Show kum ka jingpdiang burom ia kane ka kynhun kaba la sdang naduh na Mawlai Madan Heh ha ka por 2:30 janmiet da ka jingialam khmat ki kynhun jong ki nongniah bike. Nangne kila iaid ter ter shaduh Jaiaw Jingthangbriew, Jaiaw St Joseph, Jaiaw Langsning, Jaiaw Pdeng, Mawkhar Main Road, Motphran, Police Bazar, AG’s Office, Additional Secretariat, Barik, Malki Point, Dhanketi, Don Bosco Square, Laitumkhrah Beat House bad poi haduh madan Iew rynghep (Fire Brigade Ground) ha ka por 5:00 janmiet bad pynlong ia ka jingpynkup burom ia katei ka kynhun ha katei ka jaka.
Ha kane ka sngi u Myntri jong ka sorkar thymmai (MDA-2.0) u bah Shakliar Warjri ula wan ban sakhi lem ia kane ka jingpynkup burom ia katei ka kynhun. Kala don ruh ka jingai sngewbha lyngba ka skim sorkar sha baroh ki nongialehkai.