Pdiang burom ka BAM-JH ïaka Sawakani Lakiang ba wan nyngkong haka rynsan pyni dohksah ha Jharkhand

Ka Bouncers Association of Meghalaya (BAM) Jaiñtia Hills, hapoh ka jingïalam jong u President samla Yoosar Kynjing mynta ka sngi haka por janmiet kila pdiang burom ïa ka samla Sawakani Lakiang ha jingkieng myntdu surok Jowai-Shillong.

Ka samla Sawakani Lakiang ka dei kawei na ki thei pyni dohksah napoh ka jylla Meghlaya kaba la jop haka kyrdan ba nyngkong (1^st Place) haka Bikini Model Category haka rynsan ba dang shu dep pynlong shen ha nongbah Ranchi Jharkhand.

Ïa kane ka jingïakhun pyni dohksah la pynlong ha ki ar sngi kata haka 13 bad pynkut haka 14 tarik u Risaw 2023 daka WWF India World Fitness Federation Mr. & Ms. East India 2023 Zonal Body Building & Models Championship bala pynïaid da ka Pro Fitness Club,

Ka Sawakani Lakiang ka dei ka samla ka dang pule BA 1^st Semester (English Honours) ha Kiang Nangbah Govt. College Jowai, kaba dei ruh ka khun ba nyngkong jong ka kong Irina mary Lakiang bad u ma Wadbha  Lyngdoh kiba shong ba sah ha Khimusniang (PHE) Jowai.

Halor kane ka jingjop ka samla Sawakani Lakiang haba kreh sha ki lad pathai khubor ha ka jaka ba pdiang burom ïa ka, kala pynsngew ïa ka jingsngewnguh ïa ka JBB&FA bad ka MBB&FA kiba pyni lynti ïa ka haduh ba kan poi sha kane ka thong ka jingjop ha ryngkat ka jingkyrshan jong kiba ha ïing ha sem.

Kala ong ïa kane kam ïakehkai pyni dohksah kala sdang nyngkong na ka jingïakhun napoh Jaiñtia Hills buh sa ha State Level (Meghalaya) nangta haduh ban da poi ha kane ka jingïakop ha ka Ri kaba la long ha Jharkhand.

Kala pynsngew napoh ka jylla kiba leit ban mihkhmat ki don tang saw (5) haka juh ka por ka dei tang marwei ka kynthei hynrei bad baroh ki ïoh ïa ka nam jop ha katei ka rynsan pyni dohksah, ar ngut ha ka takma ksiar, ar ngut ha ka takma rupa bad kawei haka takma rnong.

Ha ka juh ka por ka kyntu ïa kiwei de ki para samla ba kin tur shaphrang da ka jingshlur ha kino kino ki kam na ka bynta ban ïoh ïa ka thong ka jingjop kaba wanrah ruh ïa ka burom jong ka District bad ka jylla hi baroh kawei.

Na ka liang ka Sawakani ka pynpaw ka jingai khublei kyrpang ïa ki para dkhot Member jong ka Bouncers Association of Meghalaya Jaiñtia Hills (BAM-JH) kiba la ai mynsiem ban leit ïakhun sha katei ka rynsan, khamtam ïa u nonghikai ka Body Mass & Fitness Gym uba dei ruh u President ka BAM-JH ma Yoosar Kynjing.

[Advertisement]