Mynta ka sngi ka Trinamool Congress (TMC) Meghalaya ka la pdiang burom ia u Adolf Lu Hitler Marak uba ju long teng u Myntri ka sorkar jylla bad uba la ju jop teng haduh lai sien kynthih, kumjuh ruh ka party kala pdiang sngewbha sa ia u State Vice President ka BJP Meghalaya u David Ch Marak bad ruh ia u Joint Director barim ka tnad Education u Bhupendra G. Momin sha ka sem jong ka Party ha ka jingialang kaba la long ha nongbah Tura.
Haba kren ha ka jingialang u Zenith Sangma uba dei u Vice President ka TMC Meghalaya ula ong ba ka seng ka sakhi mynta ka sngi ia ka jingwan pyniasoh jong ki nongialam ba rangbah shapoh ka Party, kum ki jong u Adolf Lu Hitler Marak uba la shakri ia ka jylla ha kiba bun ki liang, kum u Myntri ka Forest bad Environment bad kum u MLA. Nalor kata sa u David Ch Marak bad u Bhupendra G. Momin kiba la ju shakri hok ia ki nongshong shnong ka jylla. Kumta u ong ba ka party ka pdiang sngewbha ia baroh kine ki rangbah.
Na ka liang u Adolf Lu Hitler Marak haba kren u la ong ba kam don da kawei pat kaba kham kordor ban ia ka kyndew ka shyiap la jong, hynrei ia kane ka khyndew jong ka jylla la don noh kiba wan knieh ia ka. Kumta u ong ba ka por kala biang ban don ia ki nongialam kiba tip ia ka jingshisha, ka hok bad ka jingbha jong ki nongshong shnong. Na kata ka daw donkam ban kyrshan ia ki nongialam kiba lah ban wan rah biang ia ka khyndew ne jaka jong ki nongshong shnong kaba la shah knieh noh.
U Marak ula kynthoh jur halor ka jingiasoi MoU ka sorkar MDA hapoh ka jingialam u Conrad Sangma, halor ki jaka iakhajia pud. U ong ba ha shwa ban soi ia kane ka MoU ka sorkar kala dei ban jurip bha la kine ki jaka ki dei ki jong ka sorkar ne ki jong ki riew shimet da kaba iaid katkum ka riti synshar jong ka Sixth Schdule. U ong ba ka sorkar kam don hok ban shim rai wat tang shilyngkhot na ka khyndew ruh. Ula ong ba ki briew jong ka jylla kila ngiah ia kane ka sorkar MDA bad kila thrang ban phai sha kawei ka sorkar ban synshar ha kane ka elekshon ban wan.
Khadduh ula kyntu ia ki nongthep vote ban long kiba stad ban jied ia ki nongmihkhmat ym da kaba kheiñ ba ki dei ki kur ki jait, ki paralok ne ba ki dei na ka party kaba la rim. Hynrei dei ban jied ia ki nongmihkhmat kiba lah ban pynurlong ia mat ba sahteng, da kaba ong ruh ba lada don kiba thong T.5000/- dei ban pynshong nongrim kane ka pisa kan lah ban treikam haduh katno.
Na ka liang ka TMC ka thrang ruh ban pdiang shuh shuh sha ka Party ia kiwei pat ki riew paidbah kiba thrang bad don mynsiem ban wanrah ia ka roi ka par ia ka jylla Meghalaya.