Ka ophis jong u Executive Engineer ka Water Resources (WR) West Jaiñtia Hills District, Jowai mynta ka sngi (22/11/23) kala pynlong ïa ka jingpynsngew paidbah (Public Hearing) khamtam ïa ki trai jaka bad ki nongrep haki bynta jong ka Pynthorneiñ (Wah Myntdu) halor ka jingthmu ban wanrah ïa ka projek “Flood Management Project” kaba kot da ki klur tyngka ïa kaba yn bei pisa da ka sorkar kmie lyngba ka Ministry jong ka Water Resources.
Ha kane ka sngi ki briew jong ka tnad WR ha ryngkat ka jingdonlang jong u bah Silvester Phanbuh, MCS Extra Assistant Commissioner, ki nongïalam shnong, ki trai jaka bad ki nongrep ka Pynthorñein kiba hap hapoh ki lai tylli ki shnong kata ka Mihmyntdu, Khliehtyrshi bad ka Ladthadlaboh kila wan ban sngap ïa katei ka jingpynsngewthuh paidbah shaphang katei ka Projek ba la pynsngew da ki ophisar ka tnad WR.
Lyngba kane ka projek yn shna kyrpang ïa ki kynroh ha shilynter ka Wah ba tuid ka um ha Pynthorneiñ kata naduh ki bynta ka Kshaid Tyrshi (Tyrshi Fall) haduh ban da poi ha jingkieng PWD surok NH haka jingjngai kumba 2 KM tam eiei bad ha shi lynter yn don ruh ki jingkieng ïaid kjat ban jam sha shilliang.
Ka jingthmu ban shna ïa katei ka ‘Flood Management Project’ ka long shi bynta ban pynduna na ka jingshlei um sha ki pynthor kba khamtam ha ka por Lyiur ba jur u lapbah bad kane kan pynkylluid ïaka rukom tuid jong ka Wah, kumta ka ophis WR kala i donkam ban shna ïa katei ka porjek ban lait na ka jingshahktah ha ka bor mariang.
Ha kane ka sngi na ka liang u bah P. Kurbah (Executive Engineer) ka Water Resources uba pynïaid ïaka jingïalang ula mait phang halor kane ka jingthmu ban wanrah ïa kane ka projek, da kaba ong ba kane ka projek kan ïarap na ka jingslei um kaba ju wan jia manla ka snem ban kan wanrah ruh ka jingiada ïa ka jingshah pynjot ki hali pynthor.
Ula ong ba ïa kane ka juh ka projek la dep ban pyrshang ban shnn ha ka thaiñ Ialong, kumta la donkam ban ïoh ka jingmynjur (NOC) lyngba kane ka jingpynsngew paidbah naduh ki trai jaka ryngkat ka jingsakhi ki nongïalam shnong ban pynïaid noh sha khmat ïa kane ka kam naka bynta ban pynkhreh ïa ka DPR ban ïoh phah sha ka sorkar kmie.
U SDO ka Water Resources ma Nangtiaki Tariang ula pynsngew ka ophis kala don jingmut ban pynkhreh ïa kane ka projek haki bynta ka Pynthorneiñ da kaba shna ïa ki kynroh na baroh ar liang ban pynheh ïa ka jaka ba tuid ka Wah Myntdu katkum ka Phase-1 na Tyrshi Fall haduh Jingkieng bad kane ka rukom shna kan long katkum ki plan ba thymmai kaba khang lad ïa ka um ba kan ym ïoh lad ban shlei sha ki pynthor kba.
Halor kane ka projek na ka liang ka seng jong ki nongrep kaba la tip kum ka Myntdu Pynthorneiñ Farmer Welfare & Producers Organisation kala pynpaw ka jingsngewkmen halor ka jingwan kum kane ka projek naka bynta ka jingmyntoi ki nongrep.
U ma K.L. Pariat uba dei ruh u nongaibuid (Adviser) jong kane ka seng ula kyntu ïa kane ka tnad ban kan ïaid shakhmat da ka jingïatrei lang naduh ki trai jaka bad ki nongrep, la khmih lynti ba la kumno kumno kane ka projek ka sdang noh ban treikam ha kine ki kyndiat bnai hadien ba kut jong u snem.
