Ka Environmental Public Hearing kaba la pynlong da ka Meghalaya State Pollution Control Board (MSPCB), Shillong, mynta ka sngi ka Thuesday ha shnong Brichyrnot East Jaintia Hills na ka bynta ka jingthmu jong ka Star Cement ban khlong ia u mawshun na ka jaka kaba hap ha katei ka shnong kaba la tip kum ka Brichyrnot Limestone Deposit -II ha ka jingheh kaba 65 hectares kala long kaba iaid beit, ha kaba ha kane ka hearing na ka liang ka Dorbar Shnong Brichyrnot ka la ai ka jingkyrshan kaba pura ia ka Star Cement ban khlong ia une u mawshun na ka tei ka jaka.
Hynrei na ka liang ka KSU Narpuh kala pypaw ia ka jingpyrshah kaba jur ia kane ka jingthmu jong ka Star Cement. Ha kaba u Prsident ka KSU Narpuh Circle u ma K. Suchiang u la ong ba kane ka jingtih ia une u mawshun kan ktah ia ki um ki wah ki khlaw ki btab bad ka mariang hi ha kane ka thain, kynthup ruh ka kong Bythygrace Dkhar na ka shnong Moolamanoh, kaba la pynpaw ia ka jingpyrshah jur ia ka jingthmu jong ka Star Cement bad kaba la batai ia ki jingshah ktah ki sawdong sawkun jong ka mariang ha kane ka thain.
Kiba la ai jingkren bad kiba pynpaw ia ka jingkyrshan ia ka Star Cement ki kynthup ia u Stanly Massar, Headman Brishyrnot, Tariang Massar General Secretary Brishyrnot, Rowel Sumer Assistant Secretary Brishyrnot, Friendly Nongtdu Headman Pandare, Dominic Massar, Executive Member, Brishyrnot, Jeremaiah Dhar na shnong Tongseng, Desus Pohshna Ex-MDC, Ratacherra Village bad kiwei. Ha kane ka Public Hearing la wan ban sakhi haduh 129 ngut ki briew.
La plie ia kane ka Public Hearing da u ADC East Jaintia Hills District, u bah G. Warjri bad la pyniaid pat da u Environmental Engineer ka tnat Meghalaya Pollution Control Board, u bah Y F. Laloo, ha ka jingiadonlang kiwei de ki nongtrei na ka tnat MSPCB bad ki nongtrei ka Star Cement.
