Ki dkhot jong ka ‘Save Hynñiewtrep Mission’ mynta ka sngi kila pdiang ia u Myntri Rangbah ka jylla u Conrad. K Sangma ryngkat bad ka kynhun jong u ha Lad Nartiang, Jowai da ka jingpyrta ryngkat ki lama bad ki banner ban dawa na ka sokar jong u ban pynurlong noh ïa ki 9 tylli ki mat jingdawa jong ki 5 tylli ki seng bhalang ba kynthup JSM, HYC, EJNC, CoRP bad HANM.
Kum ban shu pynkynmaw ba ki 9 tylli ki mat ki long halor ka jingdawa pyntreikam noh mardor ïa ka Inner Line Permit (ILP) hapoh ka jylla, ban pynrung ïa ka Ktien Khasi hapoh ka kyrnit kaba Phra ka Riti synshar ka Ri India, ban pynbeit ïa biang MoU ba la dep ïasoi hapdeng ki ar jylla, ban pynkynrieh mardor ïa ki khar mator ba shong beaiñ ha ïew mawlong, ban pynbeit thymmai ïa ka policy thungkam hapoh ka jylla kaba noh shilliang, ka thohkit da ka CBI ha kaba ïadei bad ka kam bamsap hapoh ka jylla, ban tohkit da ka CBI bad pynshitom ïa kiba donkti siat ïap ïa u Cheristerfield Thangkhiew, ban thung kam noh mardor da ka lynti ba dei ïa baroh ki kam ba dangsah hapoh ka jylla bad kaba khadduh ban dawa weng nong ïa ka jingwanrah ïa ka jingkhalai Casino hapoh ka jylla.
Ha kane ka sngi ka seng ka la ioh lad ban ïakren markhmat bad u myntri rangbah ha kaba ula kular ban iakren ia kine ki mat jingdawa.
