Ka Dorbar Shnong Khimusniang, Jowai ha kane ka sngi Thohdieng 14 tarik u Rymphang kala pynlong da ka Common Platform, na ka bynta ki kyrtong MDC ki ban ïakhun na ka 19-Jowai South Constituency.
Ha kane ka sngi napdeng ki 5 ngut ki kyrtong, saw ngut kiba lawan ban ïashim bynta ha kane ka jingïalap election ‘Common Platform’ kiba kynthup ïa u ma Iaibatlang Talang na ka VPP, u ma K. Dikylsingh Phawa na ka NPP, u ma Saron Paswet uba dei ruh na ka INC bad u MDC barim bad u ma Moonlight Pariat kum u kyrtong shimet (IND) bad uba la ju long teng u MDC bad CEM ba rim ka JHADC. Katba na ka liang u kyrtong ka BJP u Heimonmitre Phawa um shem la wan poi sha kane ka Common Platform.
Hashwa ba ki kyrtong kin ai jingkren ka la don ka jingpynkhalai nusip (drawn by lots), ïa u nongkren bad la ai por 30 minit marwei ban ai jingkren ha kane ka Common Platform.
U ma Iaibatlang Talang na ka VPP ula ïoh ban kren nyngkong, da kaba ong ka jingmih pyrthei jong ka party VPP ka long ha ka nongrim Blei kata ban ïakhun ïa ka lawei bad ka ïap ka im jong ka jaitbynriew bad ka dei ruh ka party ban hikai ïaki paidbah ba kin tip kumno ban jied ïaki nongmihkhmat da kaba kyntait ïa ka spah.
Da kaba u ai nuksa lada ki paidbah ki jied da ka hok bad ka jingstad kim long shuh kiba sheptieng ban leit mih sha ki nongmihkhmat hadien jong ka Election na ka bynta ban dawa ïa ki jingdonkam.
Ula ong lada ki kyrtong ki pynlut da ka spah ha ka por ïakhun Election kin hap beit ban tuh na ka skim paidbah nalor ka tulop kaba kila ïoh, khnang ban ïoh pyndap ïa kaba la lut.
Ha kaba ïadei bad ka jingtreikam jong ka sorkar ba mynta, ula kynthoh halor ka jingmih kita ki High Level, ïa ki kam sorkar la don lypa ki briew kiba la ap bad wat ka aiñ ka treikam tang ïa ki rit ki ria, nalor ki kam Contract la trei tang da uwei u briew.
Da kaba u pynsngew ba ka jingmih ka party VPP ka long ban wanrah ïaka jingkylla ha ka pyrkhat pyrdaiñ, da kaba u ai nuksa ïaka jingwan thap vote jong ki paidbah haka election MP, nalor ka jingduna ka rukom leit bam khana sngewbha.
Ula kyntu ïa ki paidbah ba kin ai lad ïa ka VPP ba kan poi haka bor khnang ba kin ïohi ïa ka jingkylla. Kum u shipai Duriaw uba la dep ban trei ïa ka kam kumta u thrang ban ñiah ïa ka lieng jong ka JHADC haka lynti kaba dei.
Haba pynkut u pan ka jingkyrshan na ki nongshong shnong da kaba kin mih haka sngi thep vote ban pyndep ïa ka hok ban jied ïa uta u nongthaw aiñ uba don ka jingkitkhlieh.
U ma K. Dikylsingh Phawa u kyrtong ka NPP ula pynsngew ïa jingïaid lynti jong ka jingim jong u ha ka kam shakri sorkar, da kaba ong naduh ba u dang rit haduh ka kam shakri sorkar bad haduh mynta u don ïa kane ka kam shakri paidbah kaba la pynlong ïa u ban rung noh sha ka kam saiñ hima sima.
Naduh ba ula shongthaid na ka kam sorkar hadien ki 6 snem ula leh ruh shibun ki kam babha ban ïarap kylliang ïa kiba donkam, ula ong ha ka por jong ka khlam Covid-19 ula sdang ban leit synñiang khaw sha kylleng ki jaka nalor ki kam Contract bad kiwei de.
Kum u briew ha ka jingïaid lynti ula ïohi ïa ka jingeh jong ki nongtrei ka Council namar ka jingduh tulop ki nongtrei da ki phew bnai, kane kala pynlong ïa u ban mih ïakhun ïa kane ka Election namar ka District Council kala don mynta ha ka jingma, naduh ka kyndew ka shyiap, ki Waheh Shnong bad ka riti Dustur.
Kum u kyrtong lada u jop ha kane ka Election u kwah ban shna ïa ki aiñ ne ki Policy treikam ha District Council ban lait na ka jingduh tulop bad ban pynneh pynsah ïa ka Six Schedule.
U ong la dap 50 tam tylli ki snem la synshar ïa ka Council khlem da tip ïa ka aiñ, kaba lah ban ïarap ïa ka Council ban ïoh ïa ka jingïarap pisa direct (Funding) na ka sorkar pdeng, da kaba u buh jingkylli balei kim lah ban pynrung ïa kane ka aiñ?
Shuh shuh ula ai ka jingïaroh ïa ka sorkar ba mynta kaba la ïalam da ka NPP kaba la ai ka jingshakri kaba bha tam sha ki paidbah da kaba pyntrei ïa ki skim kaba long da ki spah shah, wat ki skim kiba sahteng ha Jowai la dep ban pyntreikam ïa ki.
U ma Saron Paswet ula ong kumba phi la dep pynjop shisien kum u MDC, ula ïoh ban pyntrei shibun ki kam pynroi hapoh ka Shnong Khimusniang da ka jingïatreilang bad ka Dorbar Shnong, kata naduh ki surok, ki nala um ka skul shnong, ki tyllong um bam, nalor kiwei de bad ki dang don shibun ki kam kiba dang sah kiba u thrang ban pyndep lada un ïoh biang haka jingjop.
Sa shisien u ma Paswet u pan biang ka jingkyrshan na ki paidbah ka shnong khnang ba un ïoh ban pyndep ia ki kam ba sahteng bad kumjuh ïa ka Constituency hi baroh kawei khlem da leh shilliang.
Kum u MDC ula ïohi shibun ki jingeh hapoh ka Council na ka bynta ki paidbah kata ban pyndonkam noh da ki juk Digital haba ïaleh ïa ki kot pata, khlem da shim por ïa ki nong apply wat haduh ka jingkheiñ jingdiah hapoh ka Council.
Ula ong ka bhah (share) jong ka Council kala nang hiar nang hiar, wat ïa ka jingpyntrei ïa ka Iawmusiang khlem tip naei ka pisa ka wan. Ula kynthoh halor ka jingdkhoh ka Council ban ïasoi soskular bad ki kharkhana dewbilat kaba la pynduh nong shibun eh ïa ka Council na ki NOC kiba dei ban pynthymmai manla ka por.
Ha kane ka kynti ula pyntip ba un ïakhun na ka Party Congress namar u ïohi jngai ïa ka jinglong jingman ha ka synshar khadar ba mynta bad dei tang ka party Congress kaba lah ban pynkhie im biang ïa ka Council bad ka party kala pynïeng kyrtong haduh 21 tylli ki Constituency hapoh ka JHADC bad la tikna ba kin jop palat ïa ka 15 seat.
Katba u ma Moonlight Pariat kum u krtong shimet ula ong kaba nyngkong eh donkam ban don ka mynsiem jingïatreilang na ka bynta ban pynkiew ïa ka shnong bad ban wanrah ïaka bha ka miat ha baroh ki liang.
Ka nongrim jong u ban ïakhun biang ïaka Election MDC ka dei na ka daw ba ka Council kala hap bad kala kyllon mynta bad ka por kala dawa ban pynkhie im biang ïa ka sa shisien, namar ka khyrnit ba hynriew ka dei ban ïoh synshar dalade ïa ka jinglong hok ha ka kyndew ka shyiap.
Kum u MDC ba rim u ong “nga la dep ban bat shibun ki kam hapoh ka Council bad mynta nga iohi ba ka don ha tmir ka riat, kane ka dei tang na ka daw bym tip ban jied ïa ki nongmihkhmat kiba long ki nongthaw aiñ”.
Kum u kytong shimet u kwah ban pynkhie im biang ïa ka Council bad ban pynbha pynmiat biang ïa ka sa shisien, namar ïa u kyrtong shimet ym don ka jingshah teh shah khum bad ki kyrtong shimet ki lah ban pyndap na ka bynta ban ïoh thaw ïa ka sorkar.
Shuh shuh ula ong katkum ka Constitution jong ka ri, bunsien ka aiñ ba shna ka Council kam ju treikam namar ba don ka paragraph 12 A kaba ïatakhuh bad ka sorkar jylla, kumta ka donkam bha ban pynkynriah noh ïa ka, khnang ban ïoh ruh ïa ka direct Funding na ka sorkar kmie.
U ma Pariat ula ong lada pynduh ïa ka Six Scheduled ka jingma kala ap lypa ïa nga bad ïa phi na ka bynta ka lashai la shisngi khamtam ïa ki riti dustur.
Kumta u khot ban don ka jingïatylli da kawei ka jingmut ban pyllait ïa ka jaitbynriew, da kaba ong wat pynsep ei ïa ka vote, namar mynta ym don shuh ki leader hapoh ka District Council, wat ka sorkar jylla kala thmu ban pass ïa ka aiñ land transfer act bad ïa kane ngan pyrshah nyngkong, la pynkut u ma Moonlight Pariat.
Ïa kane ka Common Platform bala pynlong da ka Dorbar Shnong Khimusniang la pynïaid da u Waheh Shnong ma Titos Bamon, ha ka jingwan sngap jong ki paidbah nongshnong shnong ki ban shim ïa ka rai ba khadduh haka sngi thep Vote jong ka 21 tarik mynta u bnai ban jied ïa u kyrtong uba ki mon ban phah sha JHADC.
