Ka jingiathuhlypa na ka tnat India Meteorological Department (IMD), Shillong ba la pynmih mynta ka sngi la iathuh ba kan sa don ka jingther jur jong u lapbah ha ki bynta jong ka East Jaiñtia Hills District, kumta na ka liang jong u Deputy Commissioner and Chairman District Disaster Management Authority, East Jaiñtia Hills District u Abhilash Baranwal, IAS ula pynmih ia hukum ba baroh ki skul kiba don hapoh ka District East Jaiñtia Hills ki dei ban khang khyrdep ha kine ki ar sngi ban wan.
Kane ka hukum kaba la pynmih ban khang skul ka long shi bynta ban iada ia ki khynnah skul ban lait na kano kano ka jingjia ba sngewsih. Ka jingkhang ia ki skul kan long naduh lashai (16/06/23) haduh ka 17 tarik mynta u bnai.