Ka seng Jaintia Women Awakening Movement (JWAM ) ka dap da ka jingsngewsih bad jingsngew khia kaba jur halor ka jingshah pynīap jong ki arngut ki nongniah kali kamai u Dameihipaia Papeng bad u Fullmoon Kharsahnoh ha ka kynhun ki riew thrangsnam.
Ka seng ka pynrem jur īa kine ki riewbymman kiba la kup da ka mynsiem ksuid ki bym don shuh ka jingiatip lem wat paradoh parasnam ruh ha kaba kila nud ban shim ïa ka jingim kiba lui lui. “Ka jingim jong ki kam dei ban ïoh jingsuk nangne na pyrthei wat shaduh sha dwar U Blei ruh”, pynpaw ka seng.
Kaseng ka ai khublei ïa ka tnad pulit kaba shah shitom ban wad bad ïoh kem ia kine ki riew thrangsnam kiba don kti.
Ka seng ka kyntu ïa ki bor ka aiñ ba kin ai da ka jingpynshitom kaba tyngeh ïa kito ki riewthrang snam da kaba set phatok shi jingim lane da ka ba phasi shisyndon ïaki. “Ngi kum ka seng ngi dap da ka jingsngew khia haba peit ia ka imlang sahlang namar wat da ki shynrang briew ruh kim shong shngaiñ shuh mynta, ngi phah ka khubor sha ki nong kamai kali ba ki dei ban husiar bha khnang ban lait na ki ne kiei kiei baroh”.
Ka seng ka phah ïa ka khubor jingsngewlem sha ki ba ha īing ha sem jong kine ki lanot bad kyrpad ia U Blei Trai Kynrad Nongbuh Nongthaw ba un kyrkhu kyrdoh ïa ka īing ka sem jong ki.