Ha ka jingpynmih hukum jong u Myntri Rangbah ka jylla Conrad K. Sangma hynne ka sngi, ba ka jingailad ban tih dewïong kan treikam noh lyngba ka buit kaba thymmai kata da ka rukom kaba katkum ka juk stad ba mynta (scientific mining), u Conrad u la phah ruh ia ka khubor kaba shai sha baroh ki trai dewïong lane ki nongtih dewïong ba kane ka aiñ kan treikam bad kan pyrkhing ia baroh.
U Myntri Rangbah u la ong ba kane ka rai jong ka Sorkar Jylla ban ailad biang ban tih dewïong hadien 11 snem kadei ruh hadien ka jingmynjur lang jong ka Sorkar pdeng. “Hadien phew snem ngi la lah ban plie ia kane ka buit tih dewïong kaba katkum ka juk ba mynta, bad kane ka dei shisha ka sngi ka ban sah kynmaw na ka bynta ki paidbah jong ka jylla. Kumba ngi la tip ba ha kine ki snem ba bun ki briew bad ki longïing bapher bapher ki la im ja da kaba tih dewïong bad kane ka jingkhang kynsan ka la ktah ia kiba bun” ong u Myntri Rangbah.
U Conrad u la iathuh ruh ba kane ka jingsdang ia kane ka buit ba thymmai ka dei ka sien ba nyngkong eh ha ka jylla. “Nga pynshlur ia baroh kiba trei ia kane ka kam ba kin pyndep ia ka jingpynrung kyrteng (apply) na ka bynta ban ioh ia ka lisen (official licence) bad ki kot ki sla ba biang na ka Sorkar Jylla”.
Ha kajuh ka por u Sangma u la ong ruh ba ka Sorkar Jylla ka dang ïakhun mynta na ka bynta ban kyrshan ruh ia kiba la tih da ka rukom kaba katkum ka juk ba mynshwa hynrei kane kan treikam bad iaid ryngkat bad ka jingiasngewthuh jingmut lang bad ka Sorkar India.