Ka Khasi Students’ Union (KSU) Nangbah Unit mar sien ioh jingtip halor ka jingkhlad ba kyndit jong u (L) Moin Phawa kala phah ia ka khubor sngewlem sha kiba ha ïing ha sem lyngba u President bad Secretary ka seng u ma Morningstar Pasi bad Eugine Hinge, da kaba pynpaw ia ka jingsngewsih kaba khraw halor ka jingkhladnoh jong u Ma Moin Phawa u ba trei kum u Lightman uba peit ia ka Sub-Station jong ka Nangbah.
Ka seng ka pynpaw ba ha ka jingshakri jong u ia katei ka Sub-Station u long u briew u ba treihok bad u ba pyndep hok ia ka kam kaba u trei ban ai ia ka jingshakri kaba bha tam ia ki paitbah nong shongshnong la ha ka por miet- synia ne la ha kino kino ki bynta kiba ki nongshong shnong ki donkam ia u.
Kum ka seng ka pynpaw ia ka jingsngewlem bad ka jingsngewkhia kaba khraw haduh kata kata hadien ba ka la tip ia ka jingkhlad syndet jong u ia kaba ym la poi pyrkhat ba kum ka iing ka sem kaba la duh noh ia u wei na ki dkhot jong ka ïing ia kaba U Blei Trai Kynrad Nongbuh Nongthaw u la shimti sha lade hi. Ka seng ka pynpaw ba ka jingleitnoh jong u ma Moin ka long ka jingduh ym tang ia ka ïing ka sem, hynrei khamtam ia ki paid nongshongshnong jong ka Shnong Nangbah hi baroh kawei bad kiba don jingiadei baroh.
Ka seng ka buh ka jingduwai ha u Blei nongbuh nongthaw ba un ai ka jingpyntngen bad un iai don ryngkat bad ka ïing ka sem baroh bad ka ai ruh ia ki kyntien “Leitsuk Ma Moin Phawa, U Blei un iai don ryngkat bad phi”.