Phah Memorandum ka JNC sha u CM halor ka jingsahteng ki Office Department haduh 15 tylli ha EJHD

Ka Jaiñtia National Council, Khliehriat Circle hapoh ka jingialam u General Secretary Bah Mebanteilang Sukhlain mynta ka sngi ka 30/08/2023 kala ai da ka Memorandum sha u Myntri Rangbah ka Jylla lyngba u Deputy Commissioner ka EJHD u A. Baranwal, IAS ban wanrah noh ia ki Office Department bapher bapher kiba don haduh 15 tylli kiba ym pat wanrah hapoh ka District.

Ki Department ki long ka :-

1. Assistant Registrar Cooperative societies.
2. The Assistant Director IPR
3. Jt. Director of Schools Education & literacy
4. The Divisional forest Office, (wildlife)
5. The Divisional forest Office (Social Forestry)
6. The Divisional forest Office (Territorial)
7. The District Librarian
8. The Executive Engineer, (CEW) A.H & Veterinary office
9. The Executive Engineer, PHE Electrical Division
10. The Executive Engineer, PHE (RWS) Division
11. The District Sericulture Office
12. The District Urban Planner/Town Planning Office
13. THE Executive Engineer, Urban Affairs
14. The District Handloom Office
15. The Weaving Inspector.
    Ka East Jaiñtia ka dei kawei na ki District kaba ai bun tam ka khajna sha ka sorkar bad ka jingdon jong ka ruh ka la kot sha ki 11 tylli ki snem hynrei haba phai pat sha ka development ka long kaba sah dien tam.
    Ka Seng ha ka jingthoh ka ong ba ka jingbym pat don kine ki office sorkar ka buh jingeh haduh katta iaki Paidbah hakaba ki hap ban leit shaduh sha Jowai bad sha Shillong, bad kane ka wanrah jingeh bha khamtam ia ki duk ki suk, nalor kata ka seng ka ong ruh ba kaba eh tam ka dei ioh ba ym lah ban pyndep ia ki kam haka shi sngi.
    Haka jingthoh ka seng ka pynpaw ba kiba bun na kitei ki tnat sorkar ki dei kiba la i donkam shisha ban don hapoh ka District ban lah ban treikam bha na ka bynta ban kyntiew ïa ki paidbah, kumjuh ruh ban kyntiew ïa ka District, kum ka tnat pule puthi, ka ban kyntiew shuh shuh ïa ka pule puthi ha ka thaiñ.
    Kumjuh ruh ka tnat Khlaw, kumba baroh ki tip ba ka East Jaiñtia Hills District ka don bun ki khlaw kiba rben bad khamtam eh ka Narpuh Wildlife Sanctuary kaba la paw bha, kane ruh ka don ha East Jaiñtia Hills District bad ki khlaw kyntang kiba don ha ki shnong ki thaw, kumjuh ruh ki paidbah kiba trei bun ki kam kiba donkam ïa ka tnat Forest, kumta donkam ban don ka tnat khlaw (Forest) ka ban treikam pura napoh ka District, kumjuh ruh kum ka tnat PWD ka ban peit ïa ka jingbit jingbiang ki surok ki lynti ki syngkien, ka tnat PHE ka ban peit ïa ka um bam, um dih, ka tnat Handloom ka ban kyntiew ïa kito ki briew ki don ka sap ban thaiñ jaiñ bad ban shna jingshna, khamtam la lap ba ki briew ha East Jaiñtia Hills District ha ki shnong bad thaiñ bapher bapher ki dei ki briew kiba don shisha ka sap ban thaiñ jaiñ, kumta kane ka tnat Handloom ka long kaba donkam ban don ban kyntiew ïa ki sap ka ban kyntiew ïa ka ïoh ka kot jong ki nongshong shnong.
    Ka seng ka ong ruh haba phai sha ka ophis PHE, ka ophis ka la don ha Khliehriat, kaba dei jong ka tnat Electrical bad ka tnat Distribution, ka long pat kaba donkam ban don da ka ophis jong u Executive Engineer (PHE) khnang ban dup lah ban treikam pura, namar ki SDO kim pat lah ban treikam pura.
    Ha kaba ïadei bad ka tnat pule puthi ka seng ka pynpaw ka jingsngewkhia kaba jur bad ong ba ka la dei ka por ban don noh da ka Office u Jt. Director of Schools Education & literacy khnang ba kan kyntiew ia ka pule puthi ha ka thaiñ.
    Kumta ka seng ka kyrpad jur ia u Myntri Rangbah ka Jylla u Conrad Sangma bad ka Sorkar ba ka la dei eh ka por ban phai khmat noh sha kane ka thaiñ bad ban wanrah noh ia ki Office Department bapher bapher hapoh kane ka District, namar ka jingbym pat biang lut ki tnat treikam jong ka sorkar hapoh ka District, ka buh jingeh haduh katta namar lada biang ki lah ban treikam pura napoh ka District kan long ka jingmyntoi bad jingkyrkhu ïa ki paidbah bad haka juh ka por kan wanrah ïa ka roi ka kiew bad kan wanrah ïa ki lad ïohkam ïohjam jong ki paidbah jong ka District. Ha ka ba iadei bad kane ka seng ka la ai Copy ruh sha ki ar ngut ki MLA kane ka thaiñ u ma Kyrmen Shylla bad kong Santa Mary Shylla kiba long ki nongmihkhmat jong kane ka thaiñ ba kin kren eiei halor kane ka bynta.