Kawei ka jingjia kaba la jia mynnin ka sngi ka 14 tarik u bnai Nailur 2025 kaba la pynpar niangkhriat ïa ki paidbah ka dong ka thaiñ Thangskai EJHD ha kaba kawei ka briew ka la phasi da lade hapoh ka ïing sah ka jong ka ha ryngkat ar ngut ki khun kiba dang rit ka rta kiba thiah ha jingthiah bad ïa kine ki khun ruh la lap ba ki la khlad noh. Kine ki khynnah rit la tip kyrteng kum ka (L) Arpita Das 3 snem shiteng bad u Punchami Das 8 snem ka rta kine ki shi kmie shi khun ki shong ki sah ha Green Colony, Top Cement Limited, Thangskai.
Katkum ka jingïathuh u lok jong kane ka briew kaba phasi u la ong ba u la mih na la ïing ha ka por 2 baje noh phai sngi ynda u lah dep ban bam ja mynsngi bad ha ka por kumba 5:50 janmiet haba u la wan phai na jingtrei ban leit noh sha la ïing u la lap ba lah khang ïa ka ïing napoh bad da ka jingïarap ki para jan ïing u la lah ban plie ïa ka jingkhang bad hangta u la lap ba ka lok ka jong u ka la phasi ha u tyllai uba la sop da ki jaiñ ha ka pangkha bad ar ngut ki khun kiba thiah lyngkthar ha jingthiah ki bym tip briew shuh hynrei kine ruh ki lah khlad noh, hadien nangta u la pyntip sha ki security katei ka jaka.
Ka kyrteng jong kane Kynthei Briew kaba phasi ka dei ka Rippa Das 24 snem ka rta bad ka ka kyrteng jong u lok u jong ka ka dei Apon Das 35 Snem ka rta bad ka shnong ka jong ki ka dei na Baratali, PO : Kalain, PS : Katigorah, District Cachar Assam.
