Hynnin ka sngi ka1 tarik u Jymmang 2025, ka Khasi Student’s Union (KSU) ka la sdang ban leit tur kynsan sha NEIGRIHMS ban pynpaw ïa ka jingpyrshah halor ka rukom thungkam-thungjam hapoh katei ka jaka khlem da pyrkhat shuh ia ka jingmyntoi jong ki samla wadkam na ka jylla kiba la pyndep ia ka jingpule ha katei ka bynta bad mynta ka sngi ruh ka la bteng biang ia ka jingiakhih da kaba shong kyllaiñ mongor hakhmat ka Administrative Block jong ka NEIGRIHMS ka long ban pynpaw ïa ka jingpyrshah halor ka jingïai sahteng ki mat jingdawa jong ka seng kiba kynthup ïa ka jingdawa ban pynjlan ïa ka rta thungkam nos na ka 30 snem sha ka 35 snem, ka jingbud pyrkhing ïa ka 80:20 ka jingkheiñ ki kynthei bad shynrang na ka bynta ki nursing ophisar, kumba la bud ha AIIMS bad kiwei kiwei ki jaka sumar da kaba kdew ba 190 tylli ki kam na ki 200 tylli ki kam ha ka por ba thungkam kham mynshwa la mang sha ki kyrtong shynrang, bad kine baroh ki dei kiba wan na Rajasthan.
Nalor kata, ki mat jingdawa ka KSU ki kynthup ruh ïa ka jingkhot thungkam kaba long pyrshah ïa ka Scheduled Tribe Reservation Policy ha kaba na ki 105 ngut ki kam Nursing Officer, katei ka jaka ka la bhah tang 2 tylli ki seat na ka bynta ki Scheduled Tribe nalor kiwei-kiwei ki mat jingdawa.
Hynnin ka sngi, ka KSU ka la kren da kaba shai sha ki bor majistor ba kin phah mih ïa u Director ka NEIGRIHMS phewse mynta ka sngi ka 2 tarik Jymmang la ioh jingtip ba u Dr. Nalin Mehta u la phet rieh sha Nongbah New Delhi.
U General Secretary jong ka KSU, Bah Daniel V. Thabah u la ong ba ka jingleh tam jong ki nongpyniaid ka NEIGRIHMS ka iapher na kiwei ki hospital kiba la paw ha India. U la pynkynmaw ba kiwei ki Hospital ki aikam kham bun ia ki kynthei katba hangne ki pyniaid ha la ka mon. “Ngi ju iohi ba kiwei ki hopital shabar jylla wat ki private ki aikam shwa ia ki trai Ri. Ka jingailad ban thungkam ia ki briew na shabar jylla ka wanrah ia ka jingduh kam duh jam ki samla jong ngi ka wanrah ruh ia ka jingbuhai shnong. Ka Sorkar kam dei ban shu thet kti ban shu ong ba ngim don bynta ei ei. Ngi ki riew paidbah ngim lah hynrei ka sorkar kaba la jied la thung hi da ki paidbah ka lah” ong u Bah Daniel.
Ha kaba iadei ba kitei ki mat jingdawa, ka Seng ka pyntikna ba kan ym sangeh ia ka jingiakhih, kata da kaba shong kyllaiñ mongor hakhmat ka Administrative Block jong ka NEIGRIHMS tad ynda ki la ioh lut ia ki jingdawa kiba myntoi ia ki samla wad kam jong ka jylla.