Ha shwa shitaiew ban poi ka sngi ban jied ia ki nongmihkhmat sha KHADC bad JHADC, ka Nongthymmai Constituency ka la pynlong da ka rynsan iatainia lane jingpynksan nia hapdeng ki kyrtong (6 ngut) bad ki jingbuh jingkylli jong ki paidbah kane ka constituency.
Ha kane ka rynsan, uwei u ‘riew Rangbah na Nongthymmai Constituency u la mih shakhmat ban buh jingkylli nyngkong ia u Bah Pynshngaiñ Sing Syiem uba dang dei ruh mynta u MDC ka Sohryngkham Constituency bad u Chief Executive Member (CEM) ka Khasi Hills Autonomous District Council (KHADC) halor ka jingiakhun jong u na Nongthymmai Constituency ha kane ka kynti wat haba u dang dei u MDC na Sohryngkham. “Phi dei u briew uba bam hi bad kynjat hi ia ka pliang Ja. U briew uba nud ban kynjat ia ka pliang Ja u nud ban kynjat ia ki briew ka Nongthymmai Constituency” ong u Rangbah.
Katei ka jingkren kaba long ruh kum ka jingbitar, ka dei hadien ba u Bah Pyniaid u la ïakhun ia ka Elekshon Shiteng samoi na Mawryngkneng Constituency ha u Risaw 2021, kata hadien ka jingkhlad kyndit jong u Bah David Nongrum MLA katei ka constituency bad ka jingbteng pat ban ïakhun mynta sa na Nongthymmai Constituency kaba dei ruh u dak jingkylli ba heh na ka bynta utei u Rangbah uba la wanrah ia katei ka jingkylli bad khamtam ia ki paidbah ka Sohryngkham Constituency ba kumno u nud ban ieh ia ka constituency bad ban wad meinah haba u la jop na ka constituency u la sdang nyngkong kum u MLA/MDC.
Haba jubab ia katei ka jingkylli kaba la pynjnang ban nguid kum u MDC bad CEM, u Bah Pyniaid u la ong ba nga don ka hok ban ïakhun na kano kano constituency bad lada wad ha kano kano ka constitution ym pat ju don ba thoh ba kin khang ia u briew ba un ïakhun na kano kano ka jaka ne na kano kano ka seng hynrei kaba donkam kadei tang ba un dei u nongshong Shnong. U la wanrah ruh ia ka jingpynksan da kaba ong ba hapoh ka jingialam jong u, kum u CEM ha KHADC, la pynurlong bad pyntreikam shibun ki aiñ bad kam ruh ba ym pat ju don CEM ba lah hapoh khyndiat snem kumba la lah hapoh ka jingialam jong u.
“Haduh 15 tylli ki aiñ la dep ban ioh hapoh 10 snem ba ngi ialam, bad lada ngam shah jied shuh ruh, ka kyrteng jong nga ka la neh” kob u Bah Pyniaid.