U Kitbok Dkhar ia uba ju khot ieit u Bah Rit, u dei tang ma u hi ha nongbah Jowai uba la shim ia ka kam die shana Budam kum ka lad kamai jakpoh jong u, wat la ia kum kane ka jait kam ngi ju iohi tang ha nongbah Shillong ia kaba la kamai tang da ki bar jylla.
Ia kane ka kam die shana sdieh ryngkhiang kum ia u shana Budam, u shana Motor bad ia u shana Kulai u Bah Rit ula sdang naduh ki snem shwa ban poi ka jingpang khlam Covid-19, kumta na ka daw jong ka Lock Down ula hap ban sangeh noh shipor bad mynta u Bah Rit ula ioh lad biang ban sdang ia kane ka kam da kaba shong die ha Stand War, Iawmusiang wat la ka jaka kam long kaba biang eh ia u, namar u hap ban shah ia u slap, ka lyer bad ka sngi.
U Bah Rit ym tang ba u die ia kine ki jait shana ba bun ki briew ki sngewtynnad ban bam, hynrei u sdieh ruh ia ki shana na ka bynta ban pyndonkam ki rawon ha kaba leit khwai dohkha. Kumta kino kino kiba donkam ia kine ki shana khwai ki lah ban wan thied na u ne ki lah ruh ban order lypa da kaba phone ha u number jong u (M)-7005914982.
Kumban shu pynkynmaw ba u Bah Rit u dei uba ju trei ia ka kam die khubor ha nongbah Jowai, hynrei na ka daw jong ka jinghiar ka kam die khubor kumta ban pyndap ialade bad ia ka ïing ka sem ula hap ban jied noh ia kane ka kam die shana Budam.
