Ka jingrakhe ia ka Republic Day ba 75 ha West Jaiñtia Hills District ruh ka la long kaba phuh da ka jingiashim bynta jong ki kynhun ba iadon bynta ha madan ryngkat ka jingwan iashim bynta jong ki nongshong shnong la ka dei ha nongbah Jowai, Amlarem bad ha Shangpung kumjuh.
Ha nongbah Jowai u Myntri ba dei peit ia ka Animal Husbandry and Veterinary Department u bah A.L Hek u la wan ban pynher ia ka lama jong ka ri bad shim ruh ia ka salute ha madan Jrisaleiñ, Jowai.
Haba kren sha ki paidbah ha kane ula pynkynmaw ia ki nongshong shnong jong ka District shaphang ki nongialeh laitluid napoh ka District, ha ka jylla bad ha ka ri India hi baroh. U la pynkynman ruh ia ki jingjop jong ka jingtreikam ka sorkar jylla lyngba ki skhim bapher bapher.
Ha nongbah Jowai kila don 20 tylli ki kynhun kiba la iashim bynta ha ka march-past kiba kynthup ia ka District Police Jowai, NCC na JNV Mukhla, na Government Girls Higher Secondary Schools, Jowai, West Jaintia Bharat Scouts & Guides, Jowai bad 15 tylli ki skul.
La wan rah ruh ia ki Tableau na ki 15 tylli ki tnat treikam sorkar jong ka District kiba la pyni ia la ki jong ki jong ki jingjop ha ka jingtreikam jong ki.
Ha kane ka sngi u Myntri ula sam ruh ia ki syrnod sha ki kynhun jop kiba kynthup ia ka JNV Mukhla kaba la wan ba nyngkong, ka St. Mary Mazzerrello Higher Seondary School, Jowai ba wan ba-ar bad ka Government Boys Higher Seondary School, Jowai kaba wan b alai.
Ha ka jingpyni Tableau ka District Horticulture Officer, Jowai ka la wan ba nyngkong, ka District Commerce & Industries Centre, Jowai kala wan ba-ar bad ka Water Conservation Officer Territorial Division Jowai kala wan ba lai.
Ka PHC kaba la ioh ia ka kyrdan ba nyngkong ka dei ka Sahsniang PHC ha ka jingpyntrei ia ka Megha Health Insurance scheme (MHIS) & Ayushman Bharat Pradhan Mantri Jan Arogya Yojana) (AB PM- JAY).
U Myntri u la ai khusnam ruh ia u HAV Amplias Synnah bad ia u ABC/264 u Arki Nikhla ka tnat ANTF namar ka jingshakri hok jong ki ia la ka kamram.
Ki la don ruh ki prokram pynbyrngia ia ki paidbah ba la shim bynta da ki dong bad shnong bapher hapoh ka nongbah Jowai. Ka la don ruh ka jingleit sam ia ki bam bad jingai sngewbha sha ki jaka ri Khunswet da ki tnat sorkar bad da ki kynhun treimon sngewbha. Kala don ruh ka jingialehkai Football kaba la iakhun Final hapdeng ka Sabah Muswang SC bad ka Football Academy of Meghalaya ha Kiang Nangbah Stadium, Ladthalaboh.
