Ka All Jaiñtia Muster Roll Workers & Labour Union, Thadlaskeiñ Block haka sien kaba hynriew kala pynlong ïaka ‘6th Annual General Meeting’ ne ka jingïakynduh lang jong ki nongtrei bylla sngi kaba la long mynta ka sngi 7 tarik u Kyllalyngkot, 2025 ha madan Wah Suka haka shnong Moodymbai West Jaiñtia Hills District.
Ïa ka jingïalang la pynïaid da u Dathrangki Lakiang President AJMRW&LU Thadlaskeiñ Block, haka jingdonlang ka kongsan kong Mishila Thabah kaba dei ka Join Labour Commissioner Labour, Employment & Skill Development Department ka sorkar jylla, ka symbud kongsan kong Dayoowanphi Iakai ka President AJMW&LU Central Body, ka Bethcey Merry Toi Labour Inspector WJH, ki nongkitkam ka Union, ki nongshah khot sngewbha bad ki nongtrei Muster Roll hapoh ka Thadlaskeiñ Block.
Ka Bethcey Merry Toi kum ka Labour Inspector jong ka District ka ai jingïaroh ïa kane ka seng kaba la trei shitom ban pynïoh jingmyntoi ïa baroh lang ki nongtreikam bylla sngi hapoh ka District bad ha ka jylla hi baroh kawei, kaba kynthup naduh ka jingdawa ban pynkiew ïa ka bainong sngi, ki lad jingïarap ne ki skim jong ka sorkar pdeng, ka bai bam tymmen (pension) skim, ki lad jingsumar, ka Scholarship ban leit pule, ki lad jingïarap ïa kiba khlad nalor kiwei kiwei de.
Ka kong Toi kala kyntu jur ïa baroh ki nongbylla sngi ba kin pynrung kyrteng hapoh ka e-SHRAM lyngba ki Common Service Center (CSC) khnang ban ïoh shibun ki jingmyntoi kumjuh ruh ban long ki Member ba pura da kaba pynpoi ïa ki kyrteng sha ka ophis jong ka tnad Labour bad kala ong kum ki Member ki dei ban siew manla u snem ïa ka bai membership.
Na ka liang ka kongsan jong kane ka sngi ka kong Mishila Thabah kaba dei ka Joint Labour Commissioner Labour, Employment & Skill Development Department jong ka sorkar jylla ka kala ai khublei snem thymmai ïa ki nongtrei bylla haka kam Muster Roll da kaba pyntip ba ka sorkar kala trei shitom katba lah ban pynïoh jingïarap ïa ki nongbylla ha kine ki sngi ban wan.
Kala ai jingïaroh ruh ïa ka seng AJMRW&LU kaba don ïa ki nongkitkam kiba stad bad kiba shemphang ban trei ïaka kam na ka bynta ka jingmyntoi lang jong baroh ki nongtrei bylla sngi, da kaba pynsngew kane ka seng kala wanrah shibun ki jingmut bad ki rukom pyntreikam ïa ki skim kiba pher bapher.
Ha ka juh ka por ka kyntu ïa kane AJMRW&LU ka kan mih shakhmat ban ïakren bad ki trai kharkhana dewbilat kiba la wan seng shapoh kane ka Ri-Lum Jaiñtia bad ban ïaleh katba lah ban pynrung kam hapoh kitei ki kharkhana da ki briew kiba dei ki trai jylla namar kane ka dei ka hok hi jong ki trai ri trai muluk.
Kala ong ruh wad ka sorkar ka dang shañiah jingïarap ha ki Company kiba heh, “lada ki trai jylla kin ïoh ban trei hapoh ki Kharkhana heh kan da long shisha ka jingmyntoi kaba khraw eh ïa ka jylla kaba don hapdeng ka jingkyrduh kam” ong ka kong Thabah.
La pynphuh pynphieng shuh shuh ïa kane ka sngi da ki jingrwai bad ka jingshad tynrai na ki nongtrei Muster Roll hapoh ka Thaslaskeiñ Block. Katba ïaki kyntien ai khublei la ïoh na ka kong Langki Pariat ka General Secretary Thadlaskeiñ Block.
Ha kane ka sngi la jied ïa ki nongkitkam All Jaiñtia Muster Roll Workers & Labour Union Thadlaskeiñ Block kiba kynthup ïa President ma Loyal Siangshai, Vice President kong Abanda Laloo, Secretary kong Sawakani Siangshai, Asst. Secretary kong Daramon Raliang bad ka kong Risa Kso, Treasurer kong Pynbiang Lytan bad Adviser ma Dathrangki Lakiang.
