Ia ka Good Shepherd Parish la plie ha ka snem 2001 bad ha kane ka snem 2026 ka la dap pura 25 snem bad ia kane ka jingrakhe Jubilee Rupa (Silver Jubilee) la pynkut hynne ka sngi 01/02/2026 ha Madan Iingskul Higher Secondary School Good Shepherd Parish Ladrymbai, East Jaintia Hills District, ha kaba la wan ban sakhilang da ki hajar ngut ki paidriewngeit napoh ka Parish (Good Shepherd Parish) bad nabar kaba la long la kum kawei na ki jingiaseng proseshon Iukharist kaba heh hapoh ka Diocese Jowai.
Ka jingpdiang burom ia u Kongsan, ia ki Kynrem ki Lyndan, ia ki ‘riewkhmat bad ia kiba la shah khot sngewbha ka la sdang naduh ka por 9:30 baje mynstep bad ia u Mot jingthoh pynsah kynmaw (Memorial Stone) la plie bad kyrkhu da ka Umkhuid Umkyntang da u Most. Rev. Victor Lyngdoh DD Archbishop ka Archdiocese Shillong.
Ha ka por 10 baje mynstep la pynlong ia ka jingknia Mass Iukharist ha kaba u Archbishop Victor u long u Nongknia Rangbah ha ryngkat ka jingiasynran lang ki Lyngdohsohblei kiba la wan sakhilang ia kane ka jingrakhe Silver Jubilee jong ka Parish Good Shepherd Ladrymbai.
U Archbishop Victor Lyngdoh haba kren ha kane ka sngi u pynpaw ia ka jingkmen haba u la ioh ia kane ka lad ban wan ban ia sakhilang ia kane ka jingrakhe Silver Jubilee jong ka Parish. U Archbishop u ong ka jingiaid lynti jong ka Parish ha kine ki 25 snem ka la ia kynduh shibun ki jingeh bad ha ka juh ka por ka Parish bad ki paidriewngeit jong ka, ki la ioh shibun ki jingkyrkhu bad ki jingkyrshan ban pyniaid ia kane ka Parish ba kan iaid shaphrang da ka jingiatreilang, ka jingiatylli bad da ka jingialong kawei bad u kyntu ia ki paidriewngeit da kaba ong “To nangiaid shaphrang ha ka jingiaieid, ka jingiatylli bad ka jingialong kawei ba kan nangkhraw shuh shuh ia ka jingrakhe Jubilee kaba sanphew snem (Golden Jubilee) ha ki por ban sa wan”.
Ha ka sneng ka kraw ia ki paid ‘riewngeit u ong ki don ki jaitbynriew haba ki la sdang ban kiew ha ka longbriew manbriew, hynrei pat ka hiar ka jingshaniah bad ka jingieid ia U Blei, hyrei na ka bynta jong ngi pat u ong ngim dei ban long kumta. Haba ngi la kiew ha ka longbriew manbriew to ngin long ki briew kiba tipbriew tipblei bad kiba sngewrit. Ban long ki Nongbud jong U Jisu kam dei tang kito kiba don kiba em, kiba nang kiba stad, u jied ia kiba rit kiba ria kumba u jied ia ki Apostol bad peit ia ki Apostol kim dei ki briew kiba nang kiba stad, ki dei ki Nongbylla bad ki Nongtong dohkha. Haba phai sha ki paid ‘riewngeit jong ka Parish Good Shepherd Ladrymbai u ong “Phi la iaid lynti ha kine ki 25 snem bad to nangiaid shaphrang bad long ka nuksa babha ia kiwei.
U Archbishop Victor Lyngdoh u pynkut ia ka jingkren jong u da ki lai tylli ki WWW bad lai tylli ki SSS kiba thew Word of God, Work in peace bad Witnesing ia ka Khubor babha nangta ia ki lai tylli ki S, ka thew Serving God (Shari ia u Blei), Surrender in God (pyndem ha u Blei) bad Serving the people (shakri ia ki para briew) bad ka jinglong Khrisrtan kam dei ban aiti ha U Blei tang shiteng hynrei pura cent perscent. Nangta u ong “To long ki Khristan kiba miat kiba bha, ki Nongpyniasuk bad ki Nongpynphriang ia ka Khubor babha bad hadien 25 snem ha kaba phin sa rakhe ia ka Golden Jubilee phin nangkiew ha ki liang baroh ban ia kaba phi long mynta”.
Ha kane ka sngi la wan sakhi ia kane ka jinglehkmen Silver Jubilee da ka jingiadonlang u ma Kyrmen Shylla MLA ka thaiñ, ka kong Mazel Ampareen Lyngdoh MLA, kong Santa Mary Shylla MLA, ma Hambertus Nongtdu MDC bad kiwei de ki kynrem ki lyndan.
