Ka Seiñ Raij Mukhla hapoh ka jingïalam Pa Langdoh Niam ryngkat bad ki Waheh Sankur “Kur Lyngdoh, Shylla, Suna, War, Sari” mynta ka sngi ki pynlong ïa ka jing pynkyntang ïa u Maji Niam ka Raij Mukhla mynta ka sngi Thymblein ha ïing Langdoh ïing Blei.
Ïa u Samla Firstly Sari la jied bad pynkyntang Maji mynta ka sngi hadien ba la ieh noh kam u Maji Niam barim ka Seiñ Raij Mukhla. Kumta ka Dorbar Sankur ryngkat bad ka jingmynjur ki Blei la jied ïa u Firstly Sari kum u Maji Niam Thymmai, te mynta ka sngi la lah ban pyndep ïa ka jingleh niam kyntang Maji Niam ha khmat u klong u skaw, i Pyrnah i pyrjin, ka pliang ka Nar bad u tylli u kyntien.
Ka kam u Maji Niam ka dei ban ai ka jingshakri ïa ka ñiam ka rukom ha shi lynter ki sngi ki jingim jong u katba u dang lah ban shim ïa kane ka kam Blei. Ha kane ka sngi pynkyntang ïa u Maji Niam ka Seiñ Raij Mukhla la wan ban ïa sakhi lang da u Pa Daloi ka Elaka, u R.M Garod Elaka Nangbah bad u Pator ka Raij Mukhla u Rghh. Dibormi Thubru bad ha kane ka sngi la wan ban ïa shim bynta lang da ki khun Samla ka Seiñ Raij Mukhla bad ki long kmie ha ryngkat ka Niam tynrai.
Hadien ba la pyndep ïa ka jingleh Niam ha phyllaw ïing ka Bei Langdoh da ka Niam Suit Niam chor da u Sying ka Dohkha bad i pyrnah i pyrjin te ka Bei Langdoh Niam ka Seiñ Raij Mukhla ka la pynkham ïa u Maji Niam ba thymmai ka Seiñ Raij Mukhla da u Tylli u Kuchi kum ka dak ba ka Bei Langdoh ka la ai bor ïa u Maji Niam ba u la lah ban sdang ban shim bynta ban pyndep ïa ki jingleh Niam leh rukom hapoh ka Seiñ Raij Mukhla.
Kane ka long katkum ka jingpyllait khubor u Standbyme Sari uba long u Waheh Sankur, uba mihkhmat na ka kur Sari.
