Ka lympung ba 26 ka Seiñ Kyntu Seiñ Raij 12 Daloi ka la poi sha ka kut ha ka sngi 29/01/2023 ha ka Seiñ Raij shnong Wapung Shnong Raij Tuber ha kane ka sngi ki khun ka bri u hynñiewtrep hynñiewskum ki la tuid paidbah sha kane ka lympung ban ïa shim bynta.
Ïa kane ka lympung pynkut la sdang ïa ka naduh ka por 10 baje shiteng mynstep bad la lam khmat ïa ka da u Rgh Wom Chyrmang President bad la pynïaid ïa ka da u ma Meliyo Lyngdoh Executive Members ka SKSR 12 –Daloi ha kane ka lympung la ïoh ïa ka jingkren pdiang burom da u ma Standbyme Sari Adviser ka SKSR 12-Daloi bad ïa ka General repot la ai da u General Secretary ma Leki Sayoo.
La ïoh ruh ïa ki jingkren phang jong u Pet Dhar na ka Seiñ Raij Nangbah halor ka phang “Ka Niam ka Tehsong ïa ka jaitbynriew” bad kumjuh ruh na ka kong Sailang Lyngdoh na ka Seiñ Raij Dienchynrum halor ka phang “U Pynneh pynkmai ïa ka Niam ka Rukom” bad la ïoh ruh ïa ki jingkren na Dr. Solony Bareh na ka Sengkhihlang halor ka phang “Pynjanai ïa ka nongrim ha ka Riti ka Dustur” bad la ïoh ruh ïa ka shad tynrai na ki tnad Seiñ Raij bapher bapher.
Ha kane ka sngi pynkut jong ka Lympung la wan ban ïa sakhi lang ha kane da u Local MLA ma Kyrmen Shylla uba long ruh u myntri jong ka Sorkar uba khmih ïa ka Social Welfare Department bad kiwei kiwei bad kumjuh la wan ban ïa sakhi lang da u ma Nehlang Lyngdoh Ex MLA Khliehriat Constituency bad u Lasky Rymbai Deputy CEM JHADC kiwei kiwei de.
Na ka liang jong ka Seiñ Kyntu Seiñ Raij 12–Daloi ka ai khublei ïa ka District Administration lynga ka ophis u Deputy Commissioner kaba la ai permission ban pynlong ïa kane ka Lympung bad ka lympung ka long kaba jop.
Ka Seiñ Kyntu Seiñ Raij ka ai khublei ruh ïa u Pa Dalloi Elaka Nangbah, Rgh, Chibun Lyngdoh bad ïaki President Secretary na ki Tnad Seiñ Raij bapher bapher ki Langdoh Niam bad kiwei kiwei de. Ka Seiñ Kyntu Seiñ Raij 12 Daloi ka ai khublei ruh ïa Police Department bad ka Health Department kiba trei shitom ryngkat ryngkat bad ka SKSR 12–Daloi bad ka bor Shnong ban pynlong ïa kane ka lympung kaba jop. Kane ka long katkum ka jingpyllait khubor u ma S. Sari Adviser ka Seiñ Kyntu Seiñ Raij 12-Daloi.
