Ka proseshon Iukharist kaba shisien shisnem ka Parish Nangbah ka la long hynne ka sngi 25/01/2026, ha Nangbah ha kaba da ki hajar ngut ki paidriewngeit ki la iawan shim bynta ha kane ka proseshon Iukharist bad u Most Rev. Ferdinand Dkhar dd, Bishop ka jylla Niam Jowai u long u kongsan ha baroh ki jinglehniam.
Ha ka por shiphew baje mynstep (10.00 AM) la don ka jingkñia Mass Iukharist bakhuid kaba la lamkhmat da u Bishop Ferdinand ha ryngkat ka jingiasynranlang ki Lyngdohsohblei kiba la iawan shim bynta ha kane ka Proseshon kaba shisien shisnem jong ka Parish Nangbah. Ha kane ka sngi la nang pynphuh pynphieng ia ka jinglehniam jong ka jingkñia Mass Iukhrist la lamkhmat ia u Bishop bad ia ki Lyngdohsohblei ban kiew sha ka Duwan ka Dupat da ka jingshadtynrai ba la shad da ka kynhun ki riewngeit na ka Balang Mupliang.
U Bishop Ferdinand Dkhar ha ka kren sneng kren kraw ia ki paidriewngeit, u pynpaw ia ka jingkmen ka bakhraw ban iohi ia ka mynsiem shongshit jong ki paidriewngeit kiba ladap hi smam ia ka Madan ïingskul Parish. Haba kren ha kane ka sngi, u Bishop u ong ba kane ka snem ka dei ka snem jong ki riewngeit bad kane ka jingwan shongshit jong ki riewngeit sha ki jinglehniam bad sha ki Proseshon ka iahapdur bha bad kane ka ka snem jong ki riewngeit bad u kyntu da kaba ong “To ai ba kane ka mynsiem shongshit ki paidriewngeit ban iabeh sha jingiaseng proseshon Iukharist bad sha ki jinglehniam kan nangpynshongshit shuh shuh ha ki por ki ban dangwan”.
Ha ka por shibaje nohphai-sngi la pynlong ia ka jingiaid proseshon Iukharist kaba la lamkhmat da ki Nongshad na ka kynhun Balang Moopasi bad ka Cathedral Band Archdiocese Shillong kaba lyngkot hapoh ka shnong Nangbah da kaba iaid lyngba ka kyntoit shnong Lumshor, Mission Compound, Iawmusiang bad wanphai sha Madan ïingskul Parish.
Ha shwa ban ioh ia ka jingkyrkhu pynwai da ka Sakrament bakhuid tam jong ka Duwan, la ioh ia ka jingkren sneng kren kraw kaba sngewtynnat da u Sohblei Rev. Father Lakhon Tre, halor ki kyntien jong u Syiem Soul ia u David “To U Trai Un don ryngkat bad phi” bad ia kine ki kyntien u Lyngdohsohblei jong ka Balang Katholik naduh ba sdang ka Jingkñia Mass u ong ia ki paidriewngeit “U Trai Un don ryngkat bad phi bad ka jubab na ki paidriewngeit pat Ryngkat bad phi ruh”. Nangta u Sohblei Lakhon Tre u ong ngi long kiba donbok ba U Jisu U don ryngkat bad ngi haduh bawai ka pyrthei bad kane ka jingdon jong u Jisu haduh ba wai ka pyrthei naba U Jisu u shongrieh ha ka Iukharist bakhuid ha ka dur jong jong u Kpu bad ka Waiñ. La pynwai ia kane ka sngi da ka jingkyrkhu ba kyrpang da ka Sakrament bakhuid tam ka Duwan na kti u Lyngdohsad, Most.Rev.Ferdinand Dkhar, Bishop ka Jylla niam Jowai.
Ha shwa ban sdang ia ka jingkñia Mass bakhuid la kyrkhu ia u Mot Baje uba don hakhmat ka ïingmane jong ka Parist da u Most Rev. Ferdinand Dkhar, Bishop ka jylllaniam Jowai, ha ka jingiadonlang u Rev. Fr. Simeon Sungoh, Fr. Desmon Nongtdu, Parish Priest, Parish Nangbah bad kiwei ki de ki phadar bad riew khmat jong ka Balang.
