Kumba long ha kyllleng ka Ri India ba ki Nongshong shnong jong ka Ri ki rakhe ia ka sngi laitluid kaba 78 snem, ka jinglaitluid na ka jingsynshar ki Phareng (British), ka Christ School Mukroh hapoh ka jingialam jong u Dr. Henry Lamin Ex-MLA uba long ruh u Nongseng ia kane ka skul ha ryngkat ka jingiatreilang ki Nonghikai bad ki khynah skul, ki la rakhe ia kane ka sngi da ka jingiphuh iphieng ha Madan ïingskul jong ka da ka March Pass, Mas Drill, ki jingshad bad da ki jingrwai tynrai kiba iahap tar bad kane ka sngi (Sngi Laitluid).
U Dr. Henry Lamin uba long u Kongsan haba kren ha kane ka sngi, u pynpaw nyngkong eh ka jingsnngewnguh ia U Blei da ka jingkmen ba U la ai ha kane ka sngi ia ka suiñbneng kaba shit kaba rang, wat hapdeng ka jingmaham ka suiñbneng ban pynhap ia u ‘lapmynsaw, u pynpaw ka jingsngewnguh ia ki Nonghikai, ia ki Khynnah skul bad ia baroh kito kiba iadon kti ha kaba pynkhreh pynkhrum bad pynlong ia kane ka sngi kaba phuh kaba phieng kaba shongkhia shongkun kaba kat ka jingrakhe sngi laitluid da shisha jong ka Ri India.
U Dr. Henry Lamin, jait ba dei u Nonghikai ka skul bah NEHU, haba kren ha kane ka sngi u la kren bad batai bniah kum u Nonghikai ia ki paidbah shaphang ka jinglaitluid bad ka jinglaitluid jong ka Ri India na ka jingsynshar ki Phareng da ka jingaitilut bad len lade ki nongialeh laitluid kum u Mahathma K Gandhi, u Valabhai Patel, ka Sarojini Naidu, u Kiang Nangbah, u Tirot Sing, u Subha Chandrabose bad kiwei de ki riewialeh laitluid jong ka Ri India.
U Dr. Henry u pynkut ia ka jingkren da kaba kyntu ia baroh ban pyndonkam hok ia kane ka jinglaitluid bad ai ba kane ka jinglaitluid kan ym ialam sha ka jinglaitlan ka ban ialam sha ka jingbymsngewtynnat ha ka imlang ka sahlang. Kham ha shwa la ioh ia ka jingkren kaba iadei bad kane ka sngi da u Babu Kalbinus Dkhar, Head Teacher jong ka St. Michel School Mukroh katba ka jingkren pdiang burom ia baroh da ka Kong Manbhalang Lamin, kaba long ka Head Mistress jong ka School (Christ School), katba ia ka jingialang bad ia baroh ki programme ha kane ka sngi la pyniaid da ka Kong Hakam-bathymmai Maner, Asst. Teacher Christ School.
Ha kane ka sngi la don lai kynhun ki Contingeant ha ka March Pass bad Mas Drill, ka Blue team ryngkat bad ka ktien maitphang “HOPE” ka Red team ryngkat bad ka ktien im sngi “LOVE” bad ka Green team bad ka ktien im sngi “FAITH”. La pynkut ia kane ka sngi da ka jingsam Sweetmeat, Chuculate bad Baloon sha baroh ki khynnah skul bad ia ka Best March Pass la iohrah ia ka Cup da ka Red team.
U Rangbah shnong jong ka Mukroh, ma Kitlang Maskut, u ong ba ha baroh shikatta ki rakhe ia ka sngi laitluid jong ka ri India ha Mukroh, hynrei pat ym pat iohi ka jingrakhe kaba iphuh iphieng kaba kum kane kaba la rakhe da ka Christ School Mukroh. Ka la long shisha ka sngi kaba kmen ha kaba ki Nonghikai, ki ia shadkmen lang ha Madan bad ki khynnah skul jong ki.
