U Myntri jong ka sorkar jylla ba dei peit ïa ka tnad kam pynroi sor bad kiwei de u ma Sniawbhalang Dhar mynta ka sngi 27 tarik u Nohprah ula wan ban plie pyrda ïa u mawnongrim jong ka ophis treikam ka ‘Seiñ Kynthai Dorbar Shnong Khliehtyrshi” kaba hap hapoh ka Thadlaskeiñ C&RD Block West Jaiñtia Hills District.
Ïa kane ka skim la pynïoh lyngba ka Chief Minister’s Special Rural Development Fund (CMRDF) ha ka jingmang pisa kaba T.10,57,206/- na ka bynta ka snem 2019-2020, ïa kaba la sdang ban pyntrei naduh ka 21 tarik June 2022 bad pyndep haduh ka 15 tarik November 2022.
Ha kane ka sngi plie ïa katei ka ophis treikam ka Seiñ Kynthai Dorbar Shnong la pynlong ïa ka jingïalang ha phyllaw ka Khliehtyrshi Dorbar Hall Cum Indoor Sports Stadium Mookyniang, ha ka jingdonlang u MLA ka thaiñ u ma Wailadmiki Shylla, u Waheh Shnong ma Kitbok Rymbai, MDC ka Sohmynting Khliehtyrshi u ma Lakhon Dkhar, kiwei de ki riew rangbah ba la shah khot sngewbha lem bad ki paidbah nongkyrshan.
Ïa ka jingïalang la pynïaid da ka kong B. Sana bad la sam ruh ïa ka Work Order sha ka shnong Lumpyrdi bad ka Urtyrkhang Khliehtyrshi. Na ka liang u ma Sniawbhalang Dhar ha ka jingkren ula kular ban sdang pyntreikam ïa ka Memorandum ba la aiti mynta hi ka sngi da kaba pyntip hadien ba la kut jong kane ka snem ka jingker sawdong ïa ka jaka ka Khliehtyrshi Dorbar Hall Cum Indoor Sports Stadium bad ban pynbha ïa ka madan ha kaba yn mang pisa haduh 30 lak bad ïa kane yn pyndep ha shwa ban poi ka Election.
Ha ka juh ka por u kyntu ïa ki nongshong shnong ka Khliehtyrshi ba kin don ka jingïatylli kawei kumba long naduh ki por mynshwa, da kaba ula pan biang ka jingkyrshan ba pura ïa u MLA ba mynta u ma Wailadmiki Shylla ba un wan biang ha ka jingjop, khnang ba un dang lah ban trei khambha bad ban wanrah ïa shibun ki skim pynroi ha kine ki snem ban wan.
Shuh shuh ula ai ka jingïaroh ïa u MLA ka thaiñ uba la trei shitom ha kine ki snem ba la dep wat hapdeng jong ka jingeh na ka khlam Covid-19, hynrei ula lah ban wamrah ïa ki kam pynroi ha kiba bun ki liang na ka bynta ka Constituency hi baroh kawei.
Ula pynthikna ba katkam ka jingïoh lum jingtip ha kane ka Election 2023 ka NPP kan sa wan ha ka bor shynshar ba tang mawei (single Majority) bad ka jingshakri sha ki paidbah kan long arshah ban ïa kane kane ka samoi.
U ma Wailadmiki Shylla ha ka jingkren ula pynsngew shaphang ki kam pynroi kiba la wanrah hapoh kane ka shnong Khliehtyrshi naduh ka umbam umdih, ki lynti syngkieng, ki skul bad ki jingïarap sha ki kynhun Balang bapher bapher.
