Jowai : Ka Jaintia Hills Development Society (JHDS) ryngkat bad ka jingiatreilang bad ka Caritas India, ka la plie ia ki lai tylli ki Oxygen Concentrators ha ka prokram ba lyngkot ba la pynlong ha ka Ophis jong ka JHDS ha Bishop’s House Jowai mynta ka sngi (16/08/2021). Ia kine ki Oxygen Concentrators la bei tyngka da ka Caritas Germany kum shibynta ban ialeh pyrshah ia ka Jingpang Covid-19.
Kine ki Oxygen Concentrator lah ban pyndonkam ha iing ha sem da kito ki briew kiba ioh ia ka jingpang Covid-19 lane kino kino ki nongpang kiba donkam oxygen khlem da donkam ban siew. Kino kino kiba donkam ia kine ki tiar ki lah ban phone ha u Director Fr. Manbha Pakem (7005843513) lane ha u Denis Kurkalang, Coordinator (8837275908) jong ka JHDS.