Ban kyntiew ïa ka jingïabit ïabiang bad ka jingïasoh jong ki shnong ki thaw ha ki thaiñ khappud, ka MLA ka Sutnga-Saipung, kong Santa Mary Shylla ha ka 17 tarik u Jylliew 2025 ka la plie paidbah ïa ka jingkieng troh lieng (Suspension Footbridge) ha Ratacherra, East Jaiñtia Hills District kaba la shna ha ka wah Amsngad.
Ia kane ka projek la pynkhreh lyngba ka Inter-State Border Areas Development Programme (ISBADP) 2023-24 da ka Sorkar Jylla. Kane ka jingkieng kan long ka jingïarap kaba khraw na ka bynta ki nongshong shnong khappud, khamtam eh ki paidbah na ka shnong Saitual.
Haba ai jingïakren ha kane ka jingplie paidbah, ka kong Santa Mary Shylla ka la ai ka jingïaroh ïa ka jingïatreilang jong ki paidbah bad ka ophis Border Areas Development Officer (BADO), Khliehriat kiba la trei shitom ban pyndep ïa kane ka projek. Kala ong ruh ba kane ka jingkieng kan kyntiew shibun ïa ka jingïasoh para shnong ha ki thaiñ khappud.
Ka la ong ruh ba kane ka jingkieng kan pynsuk bad pyniasoh ïa ki paidbah na Saitual bad kiwei ki shnong ba marjan kum ka Ratacherra, Umkiang bad kiwei pat.
U Rangbah Shnong ka Ratacherra, ma Pynkhlain Dhar ha ka jingkren jong u, u la ai ka jingïaroh halor ka jingïarap ban pyndep ïa kane ka projek. U la ong ruh ba mynshwa ki nongshong shnong na Saitual ki shem jingeh ban iaid lyngba na kane ka bynta, kumjuh ruh ki nongshong shnong ka Ratacherra ruh ki shem jingeh ban leitshaneng ka wah na bynta ki kam rep, hynrei da ka jingdon jong kane ka jingkieng ki jingeh kin kut noh.
