Ka Laskeiñ Block Unit jong ka Jowai-Shillong-Guahati Tourist Cab Association mynta ka sngi 11 tarik u Nohprah kala ïoh ban plie paidbah ïa ka jaka pynïeng kali kamai (Stand) ha Iaw Phramer West Jaiñtia Hills District.
Ha kane ka sngi la wan ban ïadonlang da u ma Sunday Manner, OC In-charge Jowai Police Station kum u kongsan, ryngkat u ma B.Tang, Waheh Chnong Phramer, ma Tony Pohshna, President JSGTCA, ma John Lyngdoh, General Secretary JSGTCA nalor kiwei de. Ïa ka jingïalang la pynïaid da u Nidawanbiang Suchiang, President Laskein Block Unit, JSGTCA la ïoh ruh ki kyntien pdiang na u Will Dkhar, Member JSGTCA, Laskeiñ Block. U John Lyngdoh, General Secretary JSGTCA ula ong kane ka Association hapoh ka jingkhmih ka JSGTCA kala ïoh ban plie paidbah ïa kane ka Stand na ka bynta ki kali kamai na Phramer sha Shillong bad ïa ka dor bai kali yn shim 250 marwei. Ula kyntu ïa ka JSGTCA Laskeiñ Block Unit ban kan ïai bteng ban ai ka jingshakri kaba bha tam bad ban pynsuk ïa ki paidbah nongleit nongwan.
Katba u ma Sunday Manner, OC ula buh ka jingkyntu ïa ki trai bad nongñiah kali ban ki pynbiang ïa ki kot kali khnang ban suk ka leit ka wan lada don ki jingjia aksiden lane kynduh bad ki bor ka aiñ. Da kaba kyntu halor ka jingtreikam 24 kynta u number 112 ban pyntip sha ki pulit.
Na ka liang ka JSGTCA Laskeiñ Block Unit kala pyntip paidbah naduh lashai ka 12 tarik u Nohprah ki kali kamai na Phramer-Shillong kin sdang ban ïeng Stand ban shakri kumjuh na Pharamer sha Silchar bad na Phramer sha Guahati da ka jingïatreilang bad ka Suchiang Travel Agency LIC-2009 7085551029.
