Ka Mitali Chandra IAS, kaba dei ka Registrar Cooperative Society, Government of Meghalaya Shillong mynta ka sngi kum ka kongsan kala wan ban plie ïaka Training programme ha Common Facility Centre ka Women’s Group & Handicrafts Multipurpose Co-operative Society Ltd. Madankynsaw Mowkyndeng West Jaiñtia Hills District.
Ha kane ka sngi la ïadonlang u Sahep B. Warjri u General Manager ka District Commerce & Industry Centre Jowai kum u Symbud Kongsan, u Sahep Lambormi Suchen, u Skill Development Officer MSSDS West Jaiñtia Hills, u Sahep J.M Paswet u Senior Cooperative Officer bad u CEO ka Laskeiñ Block, u Waheh Shnong ka Dorbar shnong ka shnong Madankynsaw-Mowkyndeng u ma Rimanki Chympa, u ma Peter Sutnga, ma Chantal Paul Pakma, ma Stalbinus Dkhar bad ki dkhot ka Women’s Group & HMPCS Ltd.
Kane ka jingai hikai ïa ki tiar shna kti da kaba pyndonkam da u siej bad u thri ka dei kawei ka lad ïohkam ïoh jam bad ka dei ka training khlem siew ei ei ha ryngkat ka bam ka dih bad ka jaka sah jaka dem ïa ki laiphew ngut kiba shah hikai ha katei ka CFC ka Society. Ïa ka Training prokram la bei pisa naka Meghalaya State Skill Development Society Jowai. Ki Nongthaiñ ki wan na kylleng sawdong ki shnong ka West Jaiñtia Hills District.
Ïa ka jingïalang la pynïaid da u ma Firstmayborn Ryngkhlem, u ma Rimanky Chympa u Waheh shnong ka Dorbar Shnong ka shnong Madankynsaw Mowkyndeng ula pdiang burom ïa ki ophisar sorkar bad ki nongshah hikai, da kaba kren ïaroh ïa ka jinglah ka Society hapoh ka jingïalam ka kong Isabella Pakma kum ka Secretary jong ka Society ban pynïaid na ka por sha ka por ïa kum kine ki prokram ai jinghikai ïa ki shnong ki thaw bad ka thaiñ hi baroh kawei ban kyntiew ïa ka ïohkam ïohjam.
Ka Sahep Mitali Chandra IAS haka jingkren ka pynpaw ïa ka jingkmen bad jingsngewnguh ïa ka Women’s Group & HMPCS Ltd Madankynsaw Mowkyndeng ba ka lah ban pynïaid ïa kum kane ka jait prokram kaba lah ban ai kam ai jam ïa ki nongshong shnong jong ka State Meghalaya da kaba kyntu ban pynmih ïa shibun ki Cooperative Society ban ai kam ai jam ïa ki nongshnongshnong ka Jylla.
Katba u bah B. Warjri u kyntu kynpham ïa ki nongshah hikai ban minot bad ban trei shitom khlem pynsepei ïa ka por khnang ban ïoh jingmyntoi bad ban ïoh kamai na kane ka kam trei kti.
La pynkut ïa ka jingïalang da ka jingkren sngewnguh ka kong Isabella Pakma.
