Ka Rangdajied United FC mynta ka kynti ka la ioh ïa ka kabu ban ialeh kai ha ka 133rd Durand Cup 2024 kane ka la wan hadien ba ka Rangdajied United FC ka thmu ban shim ïa ka jaka jong ka Hyderabad FC kum ka nongbujli ha ka Group F jong ka Durand Cup 2024 ha Shillong.
Ka Hyderabad FC kaba la don bun ki jingeh kiba la slem bha ha kaba ïadei bad ki nongïalehkai, ka pisa tyngka, ka la hap ban sangeh noh namar ba kam lah ban buh lang ïa ka kynhun kaba don 18 ngut. Kane ka kynhun ïalehkai ka Indian Super League ka la ïaleh shitom ban siew ïa ki nongïalehkai jong ka. Kane ka la pynlong ïa ka ban ïoh ïa ka jingshah khang ban wanrah ïa ki nongïalehkai. Ka Hyderabad ka la kut da kaba ïap khatduh ha ka ISL 2023-24.
Ka Hyderabad ka don ha ka Group F ryngkat ka Shillong Lajong FC, ka Tribhuvan Army FC jong ka Nepal bad ka FC Goa.
La ïathuh ba la tyrwa ruh ïa ka Dempo SC jong ka Goa ban shimti ïa ka jaka jong ka Hyderabad hynrei ka paw kumba tang ka Rangdajied ka dei kaba la pynkhreh ban rung, kane ka la long ka jingmyntoi na ka bynta jong ki. Hynrei ka jingkylli ka long, hato ki nongialehkai jong ki, ki long kiba la pynkhreh na ka bynta ka jingialehkai kaba heh kum kane?
Kat kum ka jingthoh jong u Bah Eugenson Lyngdoh u la pynpaw ba kum ki nongpyniaid, ki dap da ka jingkyrmen kaba khraw haba ki ioh kum kane ka lad. Ki thmu ban plie ki lad ki lynti ban ai rynsan ïa ki khynnah ba kin ioh ka lad ban pyni ïa ka sap jong ki. Katno tam lei ka jingbha jong kane ka kabu kan long na bynta ki khynnah ki jong ki, kumjuh ïa ka klub ha ka jingiaid ka jong ka ban leh kiei kiei kaba bha tam na bynta ki khynnah ialehkai ka jylla.
Da ka jingbujli khuid ka Hyderabad sha ka Rangdajied FC, ka kynhun ïalehkai ba ar ha Shillong kan long ha ka 5 tarik u Nailar 2024 hapdeng ka FC Goa pyrshah ïa ka Rangdajied United FC ha JN Stadium Polo naduh ka por 7:00 PM.
