Kum shi bynta ban rakhe ia ka lyngkhuh sngi kha kaba 107 jong u(L) Pandit Deen Dayal Upadhyay, u Vice Chancellor jong ka Skulbah North Eastern Hill University, Prof. P.S.Shukla, u la plie ia u Maw Nongrim “Golden Jubilee Girls Hostel” ha Deen Dayal Upadhyay Community College for Skill Development Wahiajer, West Jaiñtia Hills District hapdeng ka jingiphuh iphieng kaba la pynkhreh da ki Samla Pule jong kane ka College lyngba ki jingruwai, ki jingshad tynrai bad kiwei de ki jinglehkmen kiba pynbyrngia ia ki heh ki hain jong ka NEHU, ïa ki nongpynïaid jong ka Deen Dayal Upadhyay Community for Skill Development Wahiajer bad ia baroh ki nongshah khot sngewbha sha kane ka jingplie maw Nongrim ia ka Golden Jubilee Girls Hostel, ha kaba u Vice Chancellor jong ka NEHU Prof. P.S. Shukla u long u kongsan,.
U Professor P.S. Shukla haba kren ha kane ka sngi, u pynpaw ia ka jingkmen ka bakhraw ha kaba kum kane ka sngi kaba kynmaw ia ka jingrakhe sngikha jingdap shispah hynniew snem jong u Deen Dayal Upadhyay bad kum shi bynta ban rakhe ia kane ka sngi la lah ban plie ia u Maw Nongrim jong ka Golden Jubilee Girls Hostel ha Deen Dayal Apadhyay Community College for Skill Development, Wahiajer West Jaiñtia Hills District, ha ka jingheh ka jaka kaba 17.9 Acre kaba la ai sngewbha da ka shnong Wahiajer ban tei ia ka Golden Jubilee Girls Hostel, ha ka jingmang tyngka kaba 7 klur tyngka.
U Prof. Shukla haba kren ha kane ka sngi, u ong ban tei ia kane ka Golden Jubillee Girls Hostel ka long kaba donkam bha ba kin bit kin biang ki samla kynthei kiba pule ha kane ka Deen Dayal Community College For Skil Development.
U ong ruh ba kum u Vice Chancellor jong ka Skul bah NEHU, un pyrshang katba lah la ka buit ka bor ban thaw ki lad ki lynti ba kane ka Golden Jubilee Girls Hostel kan dep ban shna nadong shadong ha ka por jong u. U Prof Shukla, u pynkut ia ka jingkren jong u da kaba kyntu ia ki Nongshong shong shnong jong ka Wahiajer bad ia kiwei de ban ia snohkti lang na ka bynta kane ka jingthmu babha bantei ia ka Golden Jubilee Girls Hostel.
Kham hashwa la ioh ia ka jingkren pdiang sngewbha da ka Professor (Mrs) S.M. Sungoh, Principal Incharge Deen Dayal Upadhyay Community College for Skill Development Wahiajer ia baroh ki nongwan sakhi ia kane ka sngi. Nangta la ioh ia ka Felicitation bad ka Welcome song ia u Kongsan, ia ki Heh ki Haiñ bad ia kiba la shah khot sngewbha da ki samla pule jong ka Deen Dayal Upadhyay Community College.
Ha kane ka sngi la ioh ruh ia ka jingkren da u ma Sanwotki Laloo na ka bynta ka shnong Wahiajer, ka jingkren kaba sngewtynnat shaphang ka jingim jong u Deen Dayal Padhyay bad ia ka jingsdang bad ka jingmyntoi ka jingdon jong ka Deen Dayal Upadhyay Community College ha Wahiajer da u Prof. Henry Lamin (Rtd) uba long ruh u Founder Principal Incharge jong ka Deen Dayal Upadhyay Community College Wahiajer bad ka jingkren na u Shri. N.K. Bansal, Chief Engineer, CPWD, Shillong. Ia ki Programme la pyniaid da ka kong Wanda Lanong bad ia ka jingkren ai khublei kyntang iawai da u Shri. Wolnish Rymbai, Programe Coordinator, DDUCC Wahiajer.
