U MP ka Rajya Sabha u Dr. W.R. Kharlukhi mynta ka sngi 4 tarik u Kyllalyngkot, 2025 ula wan plie ia u Mawnongrim ban pynheh (Extension) ïa ka Community Hall jong ka Dorbar Shnong Mynthong Jowai ha ka jingïalang bala pynlong ha katei hi ka Community Hall ka Shnong.
Ïa kane ka Extention ïa ka Community Hall yn tei ha ka jinglut kaba kot 1 klur 90 lak tyngka tam bad ïa kane ka kam la aiti ha ka Construction Committee ban sdang ïa ka jingtei.
Ïa ka jingïalang la pynïaid da u Waheh Shnong Mynthong ma L. Pohktai uba la ai ruh ïa ki kyntien pdiang sngewbha, ïa baroh kiba ïadonlang naduh u symbud kongsan ma Wailadmiki Shylla uba dei ruh u Chairman ka MUDA, u Dolloi ka Elaka Jowai ma Puramon Kynjing, ki nongshah khot sngewbha, ki nongshnong shnong naduh ki longkmie, ki longkpa bad ki khun samla ka shnong.
La pynsngew ïa kane ka Community Hall la tei naduh ka snem 1993, ha ka jingïaid ka por ki nongshong shnong kila nang roi nang roi bad mynta kila don haduh 250 tylli ki longïing, kumta kala dawa ban pynheh noh ïa kane ka Community ka shnong khamtam ban ïoh pynlong ïa ka Dorbar.
Ka shnong haka jingwad lad ban ïoh jingïarap pisa kala ïoh na u MP ka Rajya Sabha haduh 10 lak tyngka, na ka skim napoh ka JMB 10 lak tyngka, na u MDC ka thaiñ ma Lakhon Dkhar 1 lak tyngka bad kumjuh na ka Fund Shnong nalor kiwei kaba la kot 23 lak tyngka kum ka jingsdang (1 Phase) ban tei ïa kane ka Committee Hall ha u bnai March, 2025.
U ma A. Laloo uba dei u Ex Chairman/Secretary/Adviser ula pynsngew ïaka jingtreilang (ïong lang) jong ka shnong ha kaba la sdang ïaka Fete ba nyngkong eh ban tei ïa ka Hall jong ka shnong kaba la kot 93 hajar tyngka ka jingïoh nong. Ula pynpaw ruh ka jingïaroh kaba khraw eh ïa ki nongsdang ïa kane ka shnong kiba ka trei borbah ban kyrshan ïa ka shnong bad kumjuh ïa ki nongkitkam kiba mynta.
U ma Wailadmiki Shylla u ong ka jingbuh ïa une u mawnongrim ban tei ïa ka Community Hall ka long lyngba ka jingtrei shitom jong ki nongkitkam shnong, ula ong ka Community Hall ka dei ka ïing ba donkam eh ban pynlong ïa ki jingïalang bad ka dei ka ïing (ïong lang).
“To ngin ïatreilang ban ïakhun ïa ki ñuit da kaba ym dei ban bret pathar kat shaba lap bad ula kyntu ïa ki nongïalam shnong ban long kiba ïaishah khnang ba ki kam kin long kiba ïaidbeit ïaid ryntih” ong u ma Wailad.
U kongsan ma W. R. Kharlukhi ha ka jingkren ula pynsngew ïa ki kam ha ki por ba u long kum u nongïalam seng bhalang hapoh ka Rilum Jaiñtia bad dei lyngba ka jingïarap ki paidbah nongshong shnong kila ibit ïa u ban pynpoi ha kane ka thong ban long kum u MP ka Rajay Sabha.
Ban siew kylliang ïa kane ula kular ban ai ïa ka jingïarap pisa ba 10 lak sha ka DS Mynthong bad hashwa ban kut jong ka samoi kum u MP ula kular ban kner jingïarap katba lah sha manla ki shnong hapoh ka sor Jowai bad ïa ka Ri-Lum Jaiñtia hi baroh kawei da kaba pynsngew ba ka skim MP ka kot tang 5 klur tyngka.
La pynphuh pynphieng shuh shuh ïa kane ka sngi da ka ki jingrwai na ka Music Committee, MSYAC Club, la ïoh ruh ka jingduwai na u ma S.Lyngdoh- ex General Secretary, katba ïa ki kyntien ai khublei la ïoh na u ma D. Lathong, Secretary DSM.
