Ka Dorbar Shnong Pamrakmai, East Jaiñtia Hills District ryngkat ka Village Employment Council (VEC) mynta ka sngi ka la plie paidbah bad plie maw nongrim ia ka CC Road kaba jrong 550 M bad ka Footpath kaba jrong 680 M hapoh ka Shnong ba la pyntrei na ka Scheme Shispah Sngi.
Ia kane la wan plie paidbah da u Deputy Commissioner East Jaiñtia Hills District Shri. Abhilash Baranwal, IAS, kum u kongsan bad u Dr. Tammiyaki Shylla BDO, Wapung C &RD BLOCK kum u Symbud Kongsan ryngkat ha ka jingiadonlang ki nongkitkam bad nongialam Shnong, ki riew rangbah jong ka Shnong, ki SHG, Ki nonghikai, ki khynnah skul bad ki paidbah nongshong shnong jong ka shnong Pamrakmai hi baroh kawei.
Ha kane ka sngi la pyniaid ia ka Program da u Waheh Shnong ma Iaikiewbha Rymbai, la ia ia ki kyntien pdiangburom da u Chairman Shnong ma Jamris Siangshai bad ka la don ruh ka jingshad pdiangburom na ka Iahunlang V.O.
U Deputy Commissioner kum u kongsan ha ka jingkren jong u, ula pynpaw ka jingsnewnguh ia ki nongialam shnong kiba la trei shitom ban pyntrei hok ia kane ka skhim bad u la nang iaiban ia ki ba kin trei shitom shuh shuh bad u la kular ba la don kano kano ka jingeh u kloi ban iarap ia ki. U la kyntu ruh ia ka office jong u BDO ban iatreilang ryngkat ryngkat bad ka shnong.
Kiwei de kiba la ai jingkren ha kane ka sngi ki kynthup ia u BDO kum u symbud kongsan, ma N Saioo, BTA WAPUNG C & RD Block, na u Secretary Shnong ma Wellson R D Siangshai, ma Hilarius Siangshai u wei na ki riew rangbah jong ka Shnong uba dei ruh u Waheh Shnong barim.
Khadduh eh la ioh ia ki kyntien sngewnguh na ka Secretary VEC kong Ronica Dkhar.