U Myntri Rangbah ka jylla Meghalaya, u Conrad K. Sangma ha ka sngi Thohdieng u la plie paidbah ia ka Prime Music Incubation Grand Finale ha District Auditorium, Tura. Ha kane ka prokram, u Myntri Rangbah u la pyllait ruh ia ka Theme song jong ka Me’gong Festival. Ka dei ka kamram jong ngi ban ialam lynti ia ki khynnah samla khnang ba kin kiew shaphrang bad ban long kiba myntoi ha ka imlang sahlang ong u Myntri Rangbah Conrad Sangma. Kane ka prokram kan pynshlur ia ki nongrwai ba dang samla ban pyni ia ka bor ba rieh jong ki. U la ong ruh ba ka sorkar jylla lyngba ka jingpynlong ia ki prokram bapher ka trei ban kyntiew ia ka sap ka phong ki briew ha ki jingialehkai, ki jingrwai bad ha ka ban seng ia ki kam la jong ha ka jylla.
Kumba 75 per cent na ki nongshong shnong ka jylla Meghalaya ki dei kiba dang khynnah samla bad kane ka pynlong ia ka sorkar jylla ban ai mynsiem ia ki samla. Dei kane ka ka jinglong ba ka sorkar ka pyndonkam ia ki rukom pyniaid ban pyntikna ba ki samla kin don ia ka kam kaba kyrpang ha kaban iada ia ka mariang ban pylong kaba khuid. Haba kren halor ka jingdonkam ban peit ia ka bha ka miat ki khun samla, u la ong ba ka sorkar ka long kaba kloi ban plie ka lad ia ki khynnah samla.
U Myntri Rangbah u la iathuh ba 70,000 ngut na ki samla ka jylla kiba rung ha ki kam ba la seng da u briew shimet man la u snem, kaba lah ban dang kiew u la ong. U la bynrap da kaba ong ba don ka jingkyrmen kaba khraw ha ka liang ki jingrwai jingtem ha ka jylla, bad ngi pyrkhat na ka bynta ka lawei ban pyntikna ba ki jingrwai jingtem kin kiew kin roi ha ka jylla. U la pyntip shuh ba ha ki lai snem kiba la leit, ka sorkar jylla kala ai jingiarap ia 3000 ngut ki kaitor lyngba ka Meghalaya Grassroots Music.
