Mynta ka sngi u Chief Minister ka jylla u Conrad K. Sangma ula plie pyrda ia kawei na ki mat treikam jong ka sorkar kaba la tip kum ka ‘Ginger Mission’ kaba dei ka jingthmu ban pynkiew shuh shuh ia ka jingpynmih sying hapoh ka jylla Meghalaya. Ia kane ka Mission la mang haduh Rs.121 klur tyngka ban pyntreikam hapoh ki 3 snem ban wan.
Ia kane ka prokram la plie ha ka jingiadonlang u Myntri ka kam rep kam riang ka sorkar jylla u bah Banteidor Lyngdoh ha ka jingialang kaba la pynlong ha Integrated Agriculture Training Centre, Shillong.
Haba kren kum u kongsan u Conrad ula iathuh ba ka jingthmu jong kane ka ‘Ginger Mission’ ka long ban pynioh jingmyntoi ha baroh ki liang ia ki nongrep bad ia ka jylla hi baroh kawei.
Ula ong ba ha ki por ba mynshwa kila don shibun ki lad jingiarap la pynioh ia ki nongrep hynrei ka jingthmu ban pynmyntoi ia ki nongrewp kam poi shano shano. U khmih lynti ba lyngba kane ka Ginger Mission ka sorkar kala kut jingmut ban kyntiew ar-shah ia ka ioh ka kot jong ki nongrep ka jylla.
U CM ula iathuh ba u Sying Makhir uwei na ki jait sying bala ju pyndonkam da ki longshwa man shwa kum uwei na ki jait dawai kynbat, ia une ruh ka sorkar kan ialeh ban pynkiew ia ka jingrep ia u hapoh ka jylla.
Mynta ka sngi u Chief Minister ula aiti ruh ia ki symbai nuksa bala dep pynbha sha ki nongrep kiba don ha kane ka jingialang na ka bynta ban pyrshang thung ha ki kper jong ki.
