U Myntri Rangbah ka jylla, u Conrad K. Sangma mynta ka sngi ka 18 Naiwieng u la leit ban iashim bynta ha ka jingialang plie ia ka “4th Shillong Literary Festival” ha Ward’s Lake, Shillong ha kaba la wan ban iashim bynta da ki nongthoh kot ba pawnam kum u Jackie Collins ba pawnam jong ka ri India, u Shobhaa De bad u nongthoh kot bad myllung ka ri India u Vikram Seth uba dei ruh u nongïoh khusnam Padma Shri bad kiwei kiwei.
Ha ka jingkren sdang jong u Myntri Rangbah ka jylla, u la ong ba ka thong ba kongsan jong kane ka tamasa Thoh Kot ka thmu ban pyniasoh lang ia ki nongthoh ka Jylla bad ban ai ia ki ka rynsan namar ba ki paidbah ka jylla ki don ia ka jingsngewtynnad, ka sap bad kaba kongsan eh ka jingieit ban thoh bad kane ka rynsan ha ka dur jong ka tamasa thoh Kot kan pynshlur ia ki ban iasam ia ki kam jong ki.
U la bynrap shuh shuh ba ka long ruh ka lad ia ki nongthoh trai ri ban ioh ia ka jingshai kaba kham bniah bad ban iasam ia ki jingmut bad jingpyrkhat jong ki bad ki nongthoh na kiwei pat ki bynta jong ka ri bad wat na ka pyrthei ruh.
U Myntri Rangbah u la ong ruh ba kawei pat ka jingthmu jong kane ka tamasa ka long ban pynmih ia ka jingsngewtynnad ban pule kot bad ban pynshlur ia ki briew ka jylla ban thoh kot ,”Ngi la pynbor ia ki skul ban iashim bynta namar kan pynmih ia ka jingkwah tip hapdeng ki khynnah skul ban pynrung ia ka sap pule kot bad jingthoh.
Haba kren shaphang ki jingpyrshang jong ka sorkar ban weng ia ki jingeh kiba iadei bad lyngba ki tamasa kum ka tamasa thoh kot u la ong, “Ka Meghalaya ka don ia ka jingbun briew kaba kham samla haba ianujor bad kiwei pat ki bynta jong ka ri bad ngi pyrshang ban pynthikna ba ka jingpule bad ka jingthoh kan long ka bynta kaba kongsan jong ka roi ka par bad ki kam na ka bynta ki samla jong ngi.”
U Myntri Rangbah u la pynpaw ba ka rukom thoh (arts) ka long ruh ka lad ban buh jingthoh bad wad bniah na ka bynta ban pynneh pynsah ia ka kolshor bad ka histori kaba riewspah jong ka jaitbynriew jong ngi. U la ong ba ka documentation ka long ban nang pynkhlaiñ shuh shuh bad ban pyntip shaphang ka CM’s Scholars Program ha kaba ka sorkar ka kyrshan ia ki 50 ngut ki riewstad wad bniah ha ka jingpyrshang jong ki ban wad bniah bad thoh ia ki kot ki sla ha ki bynta bapher bapher jong ka kolshor bad ka imlang sahlang jong ka jylla Meghalaya.
U la pynpaw biang ba ki tamasa kiba ju pynlong ha ka jylla ka dei ka jingbei tyngka sha ki paidbah ban kyntiew ia ki lyngba ki lad bapher bapher khamtam eh ka kam jngohkai pyrthei.
Ha kaba pynkut, u Myntri Rangbah u la ong ba ka sorkar kan pynlut kumba 4000 klur ha ka jingpynroi ia ki jingtei sha ka kam jngohkai pyrthei ha kaba iadei bad ki hotel, ki home-stay, ki jingdonkam bad kiwei kiwei.
