U Deputy Commissioner, East Jaintia Hills District, Khliehriat, u A. Baranwal, IAS, hynnin ka sngi ula plie sdang ia projek kaba la tip kum ka Lost to Follow Up (LFU) Tracking/ Tracing Drive ha ka jingialang kaba la long ha Video Conference room ka ophis DC.
Ka jingthmu jong kane ka projek ka long ban leit wat ia kito ki briew kiba don ia ka jingpang HIV kiba la ju ioh jingsumar mynshwa hynrei kiba la jah noh khnang ba yn ioh ban ialam biang ia ki sha ka jingsumar kaba tip kum ka Antiretroviral Therapy Treatment (ART). Kane ka dei ka projek kaba pyntreikam da ka Meghalaya State Network of Positive People (MSNP+) na ka bynta ki briew kiba don ia kum katei ka jingshitom.
Na ka liang jong u DC ula ong ba hapoh ka East Jaintia Hills District ki don haduh 241 ngut ki briew kiba don ia kane ka jingpang HIV bad kine ki briew ki khlem wan shuh sha ka jingsumar. Kumta ula ong ba ka kamram jong kane ka LFU ka long ban wanrah biang ia kine ki 241 ngut sha ka jingsumar ART. U la ong ruh ba lyngba kane ka prokram kan wanrah ka jingpynsngewthuh sha ki paidbah ba lyngba ka jingsumar ART uno uno u briew ne ka briew ba ngat ha ka HIV kin lah ban im kumba long lem ban lait na kano kano ka jingshah niew beiñ.
Shuh shuh u DC ula iaroh ia u Project Assistant, AHANA, Assistant Director, Meghalaya Aids Control Society (MACS) bad ia ka Meghalaya State Network of Positive People (MSNP+) kiba la pyntreikam ia kane ka projek. U ong ba ka jingpyllut ia kane ka projek ka long T.3.5 lak haduh T.4 Lak tyngka kaba la pynbit da ka CSR (Corporate Social Responsibility) bad ula pyntip ruh ban naduh mynta ia ka jingsumar ART la lah ban leh ha Khliehriat CHC.
Kiwei de kiba ai jingkren ha kane ka jingialang ki kynthup ia u Barry L Kharmalki, Project Assistant, AHANA. La iadon lang ruh i kong F. Wann, MCS, EAC, East Jaintia Hills District, Khliehriat, u Ajoy Lanong, Assistant Director for Mainstreaming Meghalaya AIDS Control Society, I kong Agui Daimai, Co-Founder of Meghalaya State Network of Positive People (MSNP+) bad kong Iada Wriah, Assistant Director, Care Support and Treatment, Meghalaya Aids Control Society (MACS) nalor kiwei de.
Ka jingkyrpad na ki nongpyniaid kane ka projek ka long ba lada don kino kino kiba kwah ban ioh ia ka jingsumar ki lah ban phone ha u Project Coordinator bah Barry L Kharmalki ha kine ki number +91 8732015954 bad yn buhrieh ia ka kyrteng jong ki.